Jýrnalist Dáýren Seiitjanuly men Oraz Álimbekov memleket basshysy Qasym-Jomart Toqaevtyń buiryǵymen ózgerister men tolyqtyrýlar engizilgen "Mass-Media" týraly zańǵa pikir bildirdi, dep habarlaidy Dalanews.kz.
Aitýlarynsha, BAQ ókilderi talai jyl kúrmeýi sheshilmei kele jatqan máseleniń sheshimi tabylǵanyna qýanyshty.
"Prezident Q.Toqaev "Mass-media týraly" zańǵa qol qoiypty. Ábden talqylanyp, talqylaý barysynda kóp ózgeris engizilgen zańdy bir sholyp shyqtym. Meniń birden kózime túskeni – BAQ-ta jariialanǵan maqalany daýlap sotqa berýdiń merzimin bir jylmen shektepti. Burynǵy zań boiynsha maqalanyń jariialanǵanyna on-on bes jyl ótip ketse de aqiqat izdeitin jýrnalisti báleqorlar sotqa súirei beretin, iaǵni jýrnalisti sotqa berýdiń merzimi joq-tyn. Qazaq jýrnalistikasynyń tarihynda mundai oqiǵa kóp bolǵan. Saiasi tapsyrys túsip bir BAQ-ty nemese bir jýrnalisti qýdalaý úshin onyń "itjylǵy" maqalasy úshin sotqa bere salatyn. Marqum Shárip Quraqbaev qurǵan "DAT" gazetin bir ministrdiń aitaqtaýymen ulttyq telearna basshysy sot arqyly jaýyp tynǵan. Sh.Quraqbaevqa da 5 mln teńge aiyppul salyp, 2 bólmeli páterin buǵattap tastap, bala-shaǵasyn ábden ábigerge salyp edi...
Jańa zań boiynsha bir jyldan keiin jýrnalistiń maqalasyn alyp sotqa bara almaityn boldy. Sot ondai aryzdy qabyldamaidy. Bul jýrnalister men BAQ basshylarynyń eńsesin basyp turǵan psihologiialyq aýyrtpalyqtan qutqaratyn jaǵdai. Áitpese, jýrnalister jazýyn jazyp alyp "meni qashan kim sotqa beredi eken" dep oinalyp qinalyp júredi. Jýrnalister sol qiyndyqtan qutyldy. Bul da bir ońynan bitken is boldy.
Jańa zańda kóńil qýantatyn basqa da baptar bar siiaqty. "Áttegen-ai" deitin tusy da bar. Bul týraly keleside keńeitip taldap jazamyn", - dedi Oraz Álimbekov.
Sonymen qatar jýrnalist Dáýren Seiitjanuly mundai qoldaý otandyq BAQ-qa sapaly aqparattyq ónim shyǵarýǵa múmkindik beretinin jetkizdi.
"Zamanaýi aqparattyq keńistik qoǵamdyq pikir úshin básekelestik oryn alatyn orynǵa ainaldy. Al óz maqsattaryna jetý úshin kóptegen oiynshylar manipýliatsiia jáne jalǵan aqparat siiaqty ártúrli ádisterdi paidalanady. Búgingi tańda ártúrli jeke maqsattary bar media naryǵyna orasan zor investitsiia tartyldy. Sońǵy jyldary otandyq sarapshylar qazaqstandyq media keńistikti qorǵaý qajet degen máseleni kóterip júr. Bul maqsatqa jetýdiń bir joly – jergilikti óndiris kompaniialaryna qoldaý kórsetý.
Bul qoldaý otandyq BAQ-qa sapaly aqparattyq ónim shyǵarýǵa múmkindik beredi. Qazaqstandyq BAQ-tyń básekege qabilettiligin arttyrý máselesi ózekti kúiinde qalyp otyr. BAQ sýbektileriniń granttyq qarjylandyrý konkýrsyna qatysýy olarǵa filmder, telehikaialar, baspa jáne onlain ónimderdi shyǵarýǵa qajetti qarajatty alýǵa múmkindik beredi. Jalpy, bul shara qazaqstandyq media keńistiginiń otandyq kontentpen toltyrylýyn yntalandyrady", - dedi jýrnalist.
