جۋرناليست داۋرەن سەيىتجان ۇلى مەن وراز الىمبەكوۆ مەملەكەت باسشىسى قاسىم-جومارت توقايەۆتىڭ بۇيرىعىمەن وزگەرىستەر مەن تولىقتىرۋلار ەنگىزىلگەن "ماسس-مەديا" تۋرالى زاڭعا پىكىر ءبىلدىردى، دەپ حابارلايدى Dalanews.kz.
ايتۋلارىنشا، ب ا ق وكىلدەرى تالاي جىل كۇرمەۋى شەشىلمەي كەلە جاتقان ماسەلەنىڭ شەشىمى تابىلعانىنا قۋانىشتى.
"پرەزيدەنت ق.توقايەۆ "ماسس-مەديا تۋرالى" زاڭعا قول قويىپتى. ابدەن تالقىلانىپ، تالقىلاۋ بارىسىندا كوپ وزگەرىس ەنگىزىلگەن زاڭدى ءبىر شولىپ شىقتىم. مەنىڭ بىردەن كوزىمە تۇسكەنى – باق-تا جاريالانعان ماقالانى داۋلاپ سوتقا بەرۋدىڭ مەرزىمىن ءبىر جىلمەن شەكتەپتى. بۇرىنعى زاڭ بويىنشا ماقالانىڭ جاريالانعانىنا ون-ون بەس جىل ءوتىپ كەتسە دە اقيقات ىزدەيتىن ءجۋرناليستى بالەقورلار سوتقا سۇيرەي بەرەتىن، ياعني ءجۋرناليستى سوتقا بەرۋدىڭ مەرزىمى جوق-تىن. قازاق جۋرناليستيكاسىنىڭ تاريحىندا مۇنداي وقيعا كوپ بولعان. ساياسي تاپسىرىس ءتۇسىپ ءبىر باق-تى نەمەسە ءبىر ءجۋرناليستى قۋدالاۋ ءۇشىن ونىڭ "يتجىلعى" ماقالاسى ءۇشىن سوتقا بەرە سالاتىن. مارقۇم ءشارىپ قۇراقبايەۆ قۇرعان "دات" گازەتىن ءبىر ءمينيستردىڭ ايتاقتاۋىمەن ۇلتتىق تەلەارنا باسشىسى سوت ارقىلى جاۋىپ تىنعان. ش.قۇراقبايەۆقا دا 5 ملن تەڭگە ايىپپۇل سالىپ، 2 بولمەلى پاتەرىن بۇعاتتاپ تاستاپ، بالا-شاعاسىن ابدەن ابىگەرگە سالىپ ەدى...
جاڭا زاڭ بويىنشا ءبىر جىلدان كەيىن ءجۋرناليستىڭ ماقالاسىن الىپ سوتقا بارا المايتىن بولدى. سوت ونداي ارىزدى قابىلدامايدى. بۇل جۋرناليستەر مەن ب ا ق باسشىلارىنىڭ ەڭسەسىن باسىپ تۇرعان پسيحولوگيالىق اۋىرتپالىقتان قۇتقاراتىن جاعداي. ايتپەسە، جۋرناليستەر جازۋىن جازىپ الىپ "مەنى قاشان كىم سوتقا بەرەدى ەكەن" دەپ وينالىپ قينالىپ جۇرەدى. جۋرناليستەر سول قيىندىقتان قۇتىلدى. بۇل دا ءبىر وڭىنان بىتكەن ءىس بولدى.
جاڭا زاڭدا كوڭىل قۋانتاتىن باسقا دا باپتار بار سياقتى. "اتتەگەن-اي" دەيتىن تۇسى دا بار. بۇل تۋرالى كەلەسىدە كەڭەيتىپ تالداپ جازامىن"، - دەدى وراز الىمبەكوۆ.
سونىمەن قاتار جۋرناليست داۋرەن سەيىتجان ۇلى مۇنداي قولداۋ وتاندىق باق-قا ساپالى اقپاراتتىق ءونىم شىعارۋعا مۇمكىندىك بەرەتىنىن جەتكىزدى.
"زاماناۋي اقپاراتتىق كەڭىستىك قوعامدىق پىكىر ءۇشىن باسەكەلەستىك ورىن الاتىن ورىنعا اينالدى. ال ءوز ماقساتتارىنا جەتۋ ءۇشىن كوپتەگەن ويىنشىلار مانيپۋلياسيا جانە جالعان اقپارات سياقتى ءارتۇرلى ادىستەردى پايدالانادى. بۇگىنگى تاڭدا ءارتۇرلى جەكە ماقساتتارى بار مەديا نارىعىنا وراسان زور ينۆەستيسيا تارتىلدى. سوڭعى جىلدارى وتاندىق ساراپشىلار قازاقستاندىق مەديا كەڭىستىكتى قورعاۋ قاجەت دەگەن ماسەلەنى كوتەرىپ ءجۇر. بۇل ماقساتقا جەتۋدىڭ ءبىر جولى – جەرگىلىكتى ءوندىرىس كومپانيالارىنا قولداۋ كورسەتۋ.
بۇل قولداۋ وتاندىق باق-قا ساپالى اقپاراتتىق ءونىم شىعارۋعا مۇمكىندىك بەرەدى. قازاقستاندىق باق-تىڭ باسەكەگە قابىلەتتىلىگىن ارتتىرۋ ماسەلەسى وزەكتى كۇيىندە قالىپ وتىر. ب ا ق سۋبەكتىلەرىنىڭ گرانتتىق قارجىلاندىرۋ كونكۋرسىنا قاتىسۋى ولارعا فيلمدەر، تەلەحيكايالار، باسپا جانە ونلاين ونىمدەردى شىعارۋعا قاجەتتى قاراجاتتى الۋعا مۇمكىندىك بەرەدى. جالپى، بۇل شارا قازاقستاندىق مەديا كەڭىستىگىنىڭ وتاندىق كونتەنتپەن تولتىرىلۋىن ىنتالاندىرادى"، - دەدى جۋرناليست.
