Máskeýde turǵyn úi aýlasynda avtokólik jarylyp, Resei Qarýly kúshteri Bas shtabynyń jedel daiarlyq basqarmasynyń basshysy qaza tapty, dep habarlaidy Dalanews.kz.
Jergilikti BAQ-tyń málimetinshe, jarylys 22 jeltoqsan kúni tańǵy ýaqytta Máskeý qalasyndaǵy Iasenevaia kóshesinde bolǵan. Kýágerlerdiń aitýynsha, Kia Sorento markaly avtokólik júrgizýshi kólikke otyryp, birneshe metr júrgennen keiin jarylǵan. Jarylystan keiin keminde jeti avtokólikke jaryqshaqtar tiip, zaqym kelgen.
Resei Federatsiiasynyń Tergeý komiteti áskeri qyzmetkerdiń ólimi faktisi boiynsha qylmystyq is qozǵady. Tergeý nusqasyna sáikes, jarylǵan avtokóliktiń túbine qoldan jasalǵan jarylǵysh qurylǵy ornatylǵan jáne ol qashyqtan iske qosylǵan.
«Alǵan jaraqattarynyń saldarynan Resei Qarýly kúshteri Bas shtaby jedel daiarlyq basqarmasynyń basshysy, general-leitenant Fanil Sarvarov kóz jumdy», - dep habarlady vedomstvo.
Qazirgi ýaqytta tergeý organdary qylmystyń birneshe nusqasyn qarastyryp jatyr. Solardyń biri bul oqiǵaǵa Ýkraina arnaiy qyzmetteriniń qatysy bolýy múmkin degen boljam.
