Prezident Densaýlyq saqtaý ministri Aqmaral Álnazarovany qabyldady, dep habarlaidy Dalanews.kz.
Memleket basshysyna densaýlyq saqtaý júiesiniń qazirgi jai-kúii men aldaǵy kezeńge arnalǵan perspektivti mindetteri jóninde baiandaldy.
Aqmaral Álnazarovanyń aitýynsha, ótken jyly elimizde ómir súrý uzaqtyǵy 75,4 jasqa jetken. Bul – álemdik ortasha deńgeiden joǵary kórsetkish. Biylǵy birinshi jartyjyldyqta jalpy ólim-jitim 3 paiyzǵa tómendedi. Byltyr alǵash ret ana men bala ólimi eń az kólemde tirkeldi.
Qasym-Jomart Toqaevqa alǵashqy meditsinalyq-sanitarlyq kómektiń tiimdiligin arttyrý, «Qoljetimdi emhana» tujyrymdamasyn júzege asyrý, halyqtyń skriningten ótýin jeńildetý boiynsha málimet berildi.
Dári-dármekpen tolyq qamtamasyz etý jáne onyń ainalymyn baqylaýdy kúsheitý sharalary júrgizilip jatyr.
2024 jylmen salystyrǵanda dárigerler tapshylyǵy respýblikada – 19 paiyzǵa, aýyldarda – 16 paiyzǵa jáne orta býyn meditsina qyzmetkerleriniń jetispeýshiligi 7 paiyzǵa azaidy.
Prezidentke meditsina qyzmetkerlerin qorǵaý sharalary jóninde aqparat berildi. Bul oraida zańnamany qatańdatýǵa, dárigerlerge shabýyl jasalǵan jaǵdaida jedel kómek kórsetýge den qoiylady.
Ministrliktiń málimetinshe, kelesi jyldan bastap áleýmettik osal toptaǵy 1 million adam meditsinalyq saqtandyrýmen qamtylady.
Memleket basshysy «Aýylda densaýlyq saqtaýdy jańǵyrtý» ulttyq jobasy aiasynda eldi mekenderdegi alǵashqy meditsinalyq-sanitarlyq kómek kórsetý nysandarynyń qurylysyn jyl sońyna deiin aiaqtaý, mindetti meditsinalyq saqtandyrý júiesin tiimdi etý, asa mańyzdy dári-dármekterdiń otandyq óndirisin damytý boiynsha birqatar mindet júktedi. Sondai-aq azamattardyń densaýlyǵyn nyǵaitý jáne meditsinalyq kómektiń sapasy men qoljetimdiligin arttyrý jumystaryn jalǵastyrý jóninde tapsyrma berdi.
