پرەزيدەنت دەنساۋلىق ساقتاۋ ءمينيسترى اقمارال ءالنازاروۆانى قابىلدادى، دەپ حابارلايدى Dalanews.kz.
مەملەكەت باسشىسىنا دەنساۋلىق ساقتاۋ جۇيەسىنىڭ قازىرگى جاي-كۇيى مەن الداعى كەزەڭگە ارنالعان پەرسپەكتيۆتى مىندەتتەرى جونىندە باياندالدى.
اقمارال ءالنازاروۆانىڭ ايتۋىنشا، وتكەن جىلى ەلىمىزدە ءومىر ءسۇرۋ ۇزاقتىعى 75،4 جاسقا جەتكەن. بۇل – الەمدىك ورتاشا دەڭگەيدەن جوعارى كورسەتكىش. بيىلعى ءبىرىنشى جارتىجىلدىقتا جالپى ءولىم-جىتىم 3 پايىزعا تومەندەدى. بىلتىر العاش رەت انا مەن بالا ءولىمى ەڭ از كولەمدە تىركەلدى.
قاسىم-جومارت توقايەۆقا العاشقى مەديسينالىق-سانيتارلىق كومەكتىڭ تيىمدىلىگىن ارتتىرۋ، «قولجەتىمدى ەمحانا» تۇجىرىمداماسىن جۇزەگە اسىرۋ، حالىقتىڭ سكرينينگتەن ءوتۋىن جەڭىلدەتۋ بويىنشا مالىمەت بەرىلدى.
دارى-دارمەكپەن تولىق قامتاماسىز ەتۋ جانە ونىڭ اينالىمىن باقىلاۋدى كۇشەيتۋ شارالارى جۇرگىزىلىپ جاتىر.
2024 جىلمەن سالىستىرعاندا دارىگەرلەر تاپشىلىعى رەسپۋبليكادا – 19 پايىزعا، اۋىلداردا – 16 پايىزعا جانە ورتا بۋىن مەديسينا قىزمەتكەرلەرىنىڭ جەتىسپەۋشىلىگى 7 پايىزعا ازايدى.
پرەزيدەنتكە مەديسينا قىزمەتكەرلەرىن قورعاۋ شارالارى جونىندە اقپارات بەرىلدى. بۇل ورايدا زاڭنامانى قاتاڭداتۋعا، دارىگەرلەرگە شابۋىل جاسالعان جاعدايدا جەدەل كومەك كورسەتۋگە دەن قويىلادى.
مينيسترلىكتىڭ مالىمەتىنشە، كەلەسى جىلدان باستاپ الەۋمەتتىك وسال توپتاعى 1 ميلليون ادام مەديسينالىق ساقتاندىرۋمەن قامتىلادى.
مەملەكەت باسشىسى «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ەلدى مەكەندەردەگى العاشقى مەديسينالىق-سانيتارلىق كومەك كورسەتۋ نىساندارىنىڭ قۇرىلىسىن جىل سوڭىنا دەيىن اياقتاۋ، مىندەتتى مەديسينالىق ساقتاندىرۋ جۇيەسىن ءتيىمدى ەتۋ، اسا ماڭىزدى دارى-دارمەكتەردىڭ وتاندىق ءوندىرىسىن دامىتۋ بويىنشا ءبىرقاتار مىندەت جۇكتەدى. سونداي-اق ازاماتتاردىڭ دەنساۋلىعىن نىعايتۋ جانە مەديسينالىق كومەكتىڭ ساپاسى مەن قولجەتىمدىلىگىن ارتتىرۋ جۇمىستارىن جالعاستىرۋ جونىندە تاپسىرما بەردى.
