Kárim Másimovtiń burynǵy senimdi adamy ári kómekshisi bolǵan Aigúl Nurieva Dýbaida quny milliardtaǵan teńgege baǵalanatyn penthaýsqa ielik etetini anyqtaldy. Sonymen qatar, ol Tynyq muhitynyń ortasyndaǵy Amerikan Samoasynan yqtiiarhat alǵan. Bul qujat oǵan AQSh azamattyǵyn alý múmkindigin beredi, dep habarlaidy Dalanews.kz.
Jańa málimetterge qaraǵanda, Nurievanyń aty Palm Jumeirah aýdanyndaǵy Al Dabas turǵyn úi keshenindegi eki qabatty penthaýsqa qatysty bazada tirkelgen. Bul aimaqta qazaqstandyq elita ókilderi kópten beri jyljymaityn múlik satyp alyp keledi. Nazarbaevqa jaqyn tulǵalar men burynǵy premer-ministrler Serik Ahmetov pen Asqar Maminniń týystary da osynda qonystanǵan. Nurievanyń páteriniń aýmaǵy 490 sharshy metr. Onda tórt jatyn bólme, birneshe qonaq bólme, jeti jýyný bólmesi, úlken ashana jáne qyzmetshilerge arnalǵan bólme bar. Qazirgi baǵasy shamamen 14,5 mln dirham nemese 2,2 mlrd teńge.
"Vyhod k moriý" telegram arnasynyń jazýynsha, Aigúl Nurieva 2000-jyldardyń ortasynda Nazarbaevtar áýletimen bailanysty kompaniialarda qyzmet etken. Az ýaqyt ishinde «Qazaqtelekom» men «Qazkommertsbank» sekildi iri aktivterdiń úlesine ie bolyp, bailyǵy shamamen 1 mlrd dollar dep baǵalanǵan. Soǵan qaramastan, ol uzaq jyldar boiy Kárim Másimovtiń kómekshisi bolyp qala berdi. Onyń múddesin qorǵaýmen qatar, jeke sharýalaryn da atqaryp otyrǵan.
Nurieva birneshe daýly kelisimderde aty ataldy. Sonyń ishinde «Qazaqtelekomnyń» «GSM Qazaqstan» (Kcell) úlesin TeliaSonera kompaniiasyna 1,5 mlrd dollarǵa satýy erekshe nazar aýdartty. Keiin Kcell London birjasyna áldeqaida tómen baǵamen shyqty. Sarapshylardyń paiymdaýynsha, baǵadaǵy aiyrmashylyq Másimov pen onyń senimdi adamdaryna paida ákelgen bolýy múmkin.
Qazaqstannan shyǵarylǵan qarajatqa Nurieva álemniń túkpir-túkpirinen jyljymaityn múlik satyp aldy. Ulybritaniia, Frantsiia men Gonkongta ol óz atymen de, burynǵy kúieýi Ǵafýr Ihsannyń atymen de páterler men villalar ielengen. Bul múlikterdiń jalpy quny 90 mln dollardan asady. Onyń qarjylyq belsendiligi Ulybritaniiada quqyq qorǵaý organdarynyń nazaryna ilikti.
Aigúl Nurieva árdaiym qosymsha josparǵa ie bolyp keldi. Qazaqstan azamattyǵymen qatar ol Kiprdiń pasportyn, Ulybritaniia men Gonkongtaǵy yqtiiarhattardy rásimdegen. Sońǵy qujattardyń ishinde Amerikan Samoasynyń rezidenttik kýáligi de bar ekeni belgili boldy. Bul qujat salyqtyq jeńildiktermen qatar AQSh azamattyǵyna aparatyn jol ashady. Eger Nurieva azamattyq alyp úlgerse, ony Qazaqstanǵa ekstraditsiialaý múmkin bolmai qalady.
