كارىم ءماسىموۆتىڭ بۇرىنعى سەنىمدى ادامى ءارى كومەكشىسى بولعان ايگۇل نۇرييەۆا دۋبايدا قۇنى ميللياردتاعان تەڭگەگە باعالاناتىن پەنتحاۋسقا يەلىك ەتەتىنى انىقتالدى. سونىمەن قاتار، ول تىنىق مۇحيتىنىڭ ورتاسىنداعى امەريكان سامواسىنان ىقتيارحات العان. بۇل قۇجات وعان اقش ازاماتتىعىن الۋ مۇمكىندىگىن بەرەدى، دەپ حابارلايدى Dalanews.kz.
جاڭا مالىمەتتەرگە قاراعاندا، نۇرييەۆانىڭ اتى Palm Jumeirah اۋدانىنداعى Al Dabas تۇرعىن ءۇي كەشەنىندەگى ەكى قاباتتى پەنتحاۋسقا قاتىستى بازادا تىركەلگەن. بۇل ايماقتا قازاقستاندىق ەليتا وكىلدەرى كوپتەن بەرى جىلجىمايتىن مۇلىك ساتىپ الىپ كەلەدى. نازاربايەۆقا جاقىن تۇلعالار مەن بۇرىنعى پرەمەر-مينيسترلەر سەرىك احمەتوۆ پەن اسقار ءماميننىڭ تۋىستارى دا وسىندا قونىستانعان. نۇرييەۆانىڭ پاتەرىنىڭ اۋماعى 490 شارشى مەتر. وندا ءتورت جاتىن بولمە، بىرنەشە قوناق بولمە، جەتى جۋىنۋ بولمەسى، ۇلكەن اسحانا جانە قىزمەتشىلەرگە ارنالعان بولمە بار. قازىرگى باعاسى شامامەن 14،5 ملن ديرحام نەمەسە 2،2 ملرد تەڭگە.
"ۆىحود ك موريۋ" تەلەگرام ارناسىنىڭ جازۋىنشا، ايگۇل نۇرييەۆا 2000-جىلداردىڭ ورتاسىندا نازاربايەۆتار اۋلەتىمەن بايلانىستى كومپانيالاردا قىزمەت ەتكەن. از ۋاقىت ىشىندە «قازاقتەلەكوم» مەن «قازكوممەرسبانك» سەكىلدى ءىرى اكتيۆتەردىڭ ۇلەسىنە يە بولىپ، بايلىعى شامامەن 1 ملرد دوللار دەپ باعالانعان. سوعان قاراماستان، ول ۇزاق جىلدار بويى كارىم ءماسىموۆتىڭ كومەكشىسى بولىپ قالا بەردى. ونىڭ مۇددەسىن قورعاۋمەن قاتار، جەكە شارۋالارىن دا اتقارىپ وتىرعان.
نۇرييەۆا بىرنەشە داۋلى كەلىسىمدەردە اتى اتالدى. سونىڭ ىشىندە «قازاقتەلەكومنىڭ» «GSM قازاقستان» (Kcell) ۇلەسىن TeliaSonera كومپانياسىنا 1،5 ملرد دوللارعا ساتۋى ەرەكشە نازار اۋدارتتى. كەيىن Kcell لوندون بيرجاسىنا الدەقايدا تومەن باعامەن شىقتى. ساراپشىلاردىڭ پايىمداۋىنشا، باعاداعى ايىرماشىلىق ءماسىموۆ پەن ونىڭ سەنىمدى ادامدارىنا پايدا اكەلگەن بولۋى مۇمكىن.
قازاقستاننان شىعارىلعان قاراجاتقا نۇرييەۆا الەمنىڭ تۇكپىر-تۇكپىرىنەن جىلجىمايتىن مۇلىك ساتىپ الدى. ۇلىبريتانيا، فرانسيا مەن گونكونگتا ول ءوز اتىمەن دە، بۇرىنعى كۇيەۋى عافۋر يحساننىڭ اتىمەن دە پاتەرلەر مەن ۆيللالار يەلەنگەن. بۇل مۇلىكتەردىڭ جالپى قۇنى 90 ملن دوللاردان اسادى. ونىڭ قارجىلىق بەلسەندىلىگى ۇلىبريتانيادا قۇقىق قورعاۋ ورگاندارىنىڭ نازارىنا ىلىكتى.
ايگۇل نۇرييەۆا ءاردايىم قوسىمشا جوسپارعا يە بولىپ كەلدى. قازاقستان ازاماتتىعىمەن قاتار ول كيپردىڭ پاسپورتىن، ۇلىبريتانيا مەن گونكونگتاعى ىقتيارحاتتاردى راسىمدەگەن. سوڭعى قۇجاتتاردىڭ ىشىندە امەريكان سامواسىنىڭ رەزيدەنتتىك كۋالىگى دە بار ەكەنى بەلگىلى بولدى. بۇل قۇجات سالىقتىق جەڭىلدىكتەرمەن قاتار اقش ازاماتتىعىنا اپاراتىن جول اشادى. ەگەر نۇرييەۆا ازاماتتىق الىپ ۇلگەرسە، ونى قازاقستانعا ەكستراديسيالاۋ مۇمكىن بولماي قالادى.
