Astanadaǵy el kózinen tasalaý ornalasqan, satylymǵa shyqqan eńseli úı satylmaı qaldy. Bastapqy baǵasy – 1,8 mlrd teńge bolǵan. Záýlim úıdiń Kárim Másimovke qatysy bolýy múmkin ekeni habarlanǵan edi,- dep habarlaıdy Dalanews.kz.
Qaıtarylǵan aktıvterdi basqarý jónindegi kompanıa Nura aýdany Ereımentaý kóshesi, 1 mekenjaıynda ornalasqan eńseli záýlim úıdi satýǵa qoıylǵan bolatyn.
Bastapqy baǵasy – 1,8 mlrd teńge, kepildik jarnasy – 117,9 mln teńge. Saýda 25 aqpanda ótedi dep belgilengen.
Másimovtiń úıi. Foto: UQK
Qyzyǵy, dál osy úıdiń sýretterin 2022 jyly Ulttyq qaýipsizdik komıteti eks-tóraǵa Kárim Másimov qamaýǵa alynǵan kezde jarıalaǵan edi. Tergeý barysynda onyń zańsyz ıemdengen birneshe nysany anyqtalǵan, solardyń biri - eńseli kotej.
Másimov 2022 jylǵy Qańtar oqıǵasy kezinde ustaldy. Keıin oǵan «memleketke opasyzdyq jasady», «bılikti kúshpen basyp alýǵa árekettendi» degen aýyr aıyptar taǵylyp, 2023 jylǵy sáýirde 18 jylǵa sottaldy. Ol úkimge appelásıalyq shaǵym túsirgenimen, sot sheshimdi ózgertpedi. Byltyr jazda «raqymshylyqqa iligemin be» degen úmiti de aqtalmaı, Toqaev «murttynyń» ótinishin maqul kórmedi.
Másimovtiń úıi. Foto:e-qazyna.kz
Endi Aktıvterdi qaıtarý mekemesi bir kezderi Másimov ómir súrgen elıtalyq úıdi aýksıonǵa qoıyp otyr. «Murttynyń» murasy memleketke qaıtarylyp, jańa ıesin tabýǵa daıyn.
Sarapshylar munyń saýdagerler úshin qyzyq nysan, al memleket úshin jymqyrylǵan baılyqtyń bir ushy elge qaıtqany dep topshylap otyr.
