Burynǵy Májilis depýtaty, ekonomist Omarhan Óksikbaev UQK burynǵy basshysy Kárim Másimovtiń artynda batys elderi turýy múmkin ekenin aitty, - dep habarlaidy Dalanews.kz.
Jýyrda Másimov Prezident Toqaevtan keshirim suraǵany belgili boldy. Qazir Kárim Másimov Sybailas jemqorlyqqa qarsy is-qimyl agenttiginiń qaýlysy negizinde Astanadaǵy UQK tergeý izoliatorynda otyr.
"Shynynda da, ol osy mekemeden 2024 jylǵy naýryzda Qazaqstan Respýblikasy Prezidentiniń atyna keshirim jasaý týraly ótinish joldady", - dep habarlaǵan edi UQK buǵan deiin.
"Onyń ómirin halyq sheshpeidi, Prezident sheshedi. Halyq "keshirdim" dep aitsa da zańmen sottalǵan adamdy túrmeden eshkim bosatpaidy. Ony túrmeden raqymshylyq jasap bosatatyn ókilettilik quqyq tek Prezidentte. Sondyqtan Prezidentke jazyp otyr. Osynsha jylǵa sottalyp otyrǵan adam qai jerde qandai túrmeden qutylatyn múmkindik bar, sonyń bárin paidalanǵysy kelip otyr. Meniń eń bir qaýiptenetin máselem bar.
Ol mynadai aýyr bappen ketkenin bile otyryp, soǵan raqymshylyq suraýynyń astarynda birdeńe jatqan siiaqty. Saiasi oiyn emes. Batysta qoldaýshylary bar shyǵar. Solar "osylai jasa" dep aitýy múmkin. Eýropa bolsyn, Amerika bolsyn. Solai da bolýy múmkin. Eger ol jaqtan sondai qoldaý bolyp, sondai aqyl aitsa, ol qaýipti dúnie, túrmeden qutylyp ketýi de múmkin. Batys azýyn ashyp, "mynany jiber, mynaý jazyqsyz eken" dep áńgime aityp jatsa, jasyratyny joq, keide quqyq qorǵandary basqa bapty taýyp, qatelesippiz dep keshirim surai salady. Sodan qorqamyn. Bul jerde áliptiń artyn tosamyz", - dedi Óksikbaev bul týrasynda Bilgen Durys-qa bergen suhbatynda.
Sonymen qatar, ol Amerika Másimovti ne úshin qoldaýy múmkin ekenin ashyq aitty.
"Onyń astarynda úlken dúnieler jatyr ǵoi. "Qashaǵan", "Qarashyǵanaq" degen investorlar kelgende, sol jobalardyń elimizge investor bolyp enýine Kárim Másimov ol kezde Úkimet basshysy retinde qatty aralasyp, sol sharýanyń, sol sharttyń jasalýynda basynda boldy jáne tikelei onyń oryndaýshysy boldy", - dedi ol.
Aita keteiik, 2023 jyly 24 sáýirde Astananyń qylmystyq ister jónindegi mamandandyrylǵan aýdanaralyq soty QR Ulttyq qaýipsizdik komitetiniń eks-tóraǵasy Kárim Másimovke, Ulttyq qaýipsizdik komiteti tóraǵasynyń eks-orynbasarlary Ánýar Sadyqulov, Dáýlet Erǵojin, Marat Osipovke qatysty qylmystyq is boiynsha úkim shyǵarǵan bolatyn.
Sot isti "Asa qupiia" degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boiynsha kináli dep tanylyp, 18 jyl bas bostandyǵynan airyldy. Sonymen qatar, memlekettik qyzmette ómir boiy qyzmet ete almaityny jáne múlki tárkilenetini aityldy. Kárim Másimov buǵan qosa general sheni men memlekettik nagradalarynan aiyryldy.
Al onyń orynbasary Dáýlet Erǵojin Qylmystyq kodekstiń 179-babynyń 3-bóligi, 362-babynyń 4-bóligi 3-tarmaǵy boiynsha kináli dep tanylyp, 15 jylǵa bas bostandyǵynan aiyryldy.
Keiin apelliatsiialyq saty K.Másimovke, A. Sadyqulovqa jáne D. Erǵojinge qatysty birinshi satydaǵy sot úkimin qaýipsizdigi eń joǵary mekemeden qaýipsizdigi ortasha mekemede jazasyn óteý boiynsha ózgertti.
