بۇرىنعى ءماجىلىس دەپۋتاتى، ەكونوميست ومارحان وكسىكبايەۆ ۇقك بۇرىنعى باسشىسى كارىم ءماسىموۆتىڭ ارتىندا باتىس ەلدەرى تۇرۋى مۇمكىن ەكەنىن ايتتى، - دەپ حابارلايدى Dalanews.kz.
جۋىردا ءماسىموۆ پرەزيدەنت توقايەۆتان كەشىرىم سۇراعانى بەلگىلى بولدى. ءقازىر كارىم ءماسىموۆ سىبايلاس جەمقورلىققا قارسى ءىس-قيمىل اگەنتتىگىنىڭ قاۋلىسى نەگىزىندە استاناداعى ۇقك تەرگەۋ يزولياتورىندا وتىر.
"شىنىندا دا، ول وسى مەكەمەدەن 2024 جىلعى ناۋرىزدا قازاقستان رەسپۋبليكاسى پرەزيدەنتىنىڭ اتىنا كەشىرىم جاساۋ تۋرالى ءوتىنىش جولدادى"، - دەپ حابارلاعان ەدى ۇقك بۇعان دەيىن.
"ونىڭ ءومىرىن حالىق شەشپەيدى، پرەزيدەنت شەشەدى. حالىق "كەشىردىم" دەپ ايتسا دا زاڭمەن سوتتالعان ادامدى تۇرمەدەن ەشكىم بوساتپايدى. ونى تۇرمەدەن راقىمشىلىق جاساپ بوساتاتىن وكىلەتتىلىك قۇقىق تەك پرەزيدەنتتە. سوندىقتان پرەزيدەنتكە جازىپ وتىر. وسىنشا جىلعا سوتتالىپ وتىرعان ادام قاي جەردە قانداي تۇرمەدەن قۇتىلاتىن مۇمكىندىك بار، سونىڭ ءبارىن پايدالانعىسى كەلىپ وتىر. مەنىڭ ەڭ ءبىر قاۋىپتەنەتىن ماسەلەم بار.
ول مىناداي اۋىر باپپەن كەتكەنىن بىلە وتىرىپ، سوعان راقىمشىلىق سۇراۋىنىڭ استارىندا بىردەڭە جاتقان سياقتى. ساياسي ويىن ەمەس. باتىستا قولداۋشىلارى بار شىعار. سولار "وسىلاي جاسا" دەپ ايتۋى مۇمكىن. ەۋروپا بولسىن، امەريكا بولسىن. سولاي دا بولۋى مۇمكىن. ەگەر ول جاقتان سونداي قولداۋ بولىپ، سونداي اقىل ايتسا، ول ءقاۋىپتى دۇنيە، تۇرمەدەن قۇتىلىپ كەتۋى دە مۇمكىن. باتىس ازۋىن اشىپ، "مىنانى جىبەر، مىناۋ جازىقسىز ەكەن" دەپ اڭگىمە ايتىپ جاتسا، جاسىراتىنى جوق، كەيدە قۇقىق قورعاندارى باسقا باپتى تاۋىپ، قاتەلەسىپپىز دەپ كەشىرىم سۇراي سالادى. سودان قورقامىن. بۇل جەردە ءالىپتىڭ ارتىن توسامىز"، - دەدى وكسىكبايەۆ بۇل تۋراسىندا Bilgen Durys-قا بەرگەن سۇحباتىندا.
سونىمەن قاتار، ول امەريكا ءماسىموۆتى نە ءۇشىن قولداۋى مۇمكىن ەكەنىن اشىق ايتتى.
"ونىڭ استارىندا ۇلكەن دۇنيەلەر جاتىر عوي. "قاشاعان"، "قاراشىعاناق" دەگەن ينۆەستورلار كەلگەندە، سول جوبالاردىڭ ەلىمىزگە ينۆەستور بولىپ ەنۋىنە كارىم ءماسىموۆ ول كەزدە ۇكىمەت باسشىسى رەتىندە قاتتى ارالاسىپ، سول شارۋانىڭ، سول شارتتىڭ جاسالۋىندا باسىندا بولدى جانە تىكەلەي ونىڭ ورىنداۋشىسى بولدى"، - دەدى ول.
ايتا كەتەيىك، 2023 جىلى 24 ساۋىردە استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى ق ر ۇلتتىق قاۋىپسىزدىك كوميتەتىنىڭ ەكس-توراعاسى كارىم ماسىموۆكە، ۇلتتىق قاۋىپسىزدىك كوميتەتى ءتوراعاسىنىڭ ەكس-ورىنباسارلارى ءانۋار سادىقۇلوۆ، داۋلەت ەرعوجين، مارات وسيپوۆكە قاتىستى قىلمىستىق ءىس بويىنشا ۇكىم شىعارعان بولاتىن.
سوت ءىستى "اسا قۇپيا" دەگەن بەلگىمەن قارادى. كارىم ءماسىموۆ ق ر قىلمىستىق كودەكسىنىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگىنىڭ 3-تارماعى بويىنشا كىنالى دەپ تانىلىپ، 18 جىل باس بوستاندىعىنان ايرىلدى. سونىمەن قاتار، مەملەكەتتىك قىزمەتتە ءومىر بويى قىزمەت ەتە المايتىنى جانە مۇلكى تاركىلەنەتىنى ايتىلدى. كارىم ءماسىموۆ بۇعان قوسا گەنەرال شەنى مەن مەملەكەتتىك ناگرادالارىنان ايىرىلدى.
ال ونىڭ ورىنباسارى داۋلەت ەرعوجين قىلمىستىق كودەكستىڭ 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلىپ، 15 جىلعا باس بوستاندىعىنان ايىرىلدى.
كەيىن اپەللياسيالىق ساتى ك.ماسىموۆكە، ا. سادىقۇلوۆقا جانە د. ەرعوجينگە قاتىستى ءبىرىنشى ساتىداعى سوت ۇكىمىن قاۋىپسىزدىگى ەڭ جوعارى مەكەمەدەن قاۋىپسىزدىگى ورتاشا مەكەمەدە جازاسىن وتەۋ بويىنشا وزگەرتتى.
