2020 jyldyń 6 naýryzynda Pavlodar oblysy ákimi Ábilqaiyr Sqaqov jáne Eurasian Resources Group S.a.r.l. (ERG) Qamqorshylyq keńesiniń tóraǵasy – Bas atqarýshy direktorynyń orynbasary Aldiiar Qaztaev ózara áriptestik týraly memorandýmǵa qol qoidy. Memorandýmǵa sáikes Eýraziialyq Top Pavlodar oblysyndaǵy áleýmettik jobalardy iske asyrýǵa 2,9 mlrd teńge bóledi.
Qol qoiý rásimine ERG Direktorlar Keńesiniń tóraǵasy Aleksandr Mashkevich qatysty.
Memorandým boiynsha bólingen qarajatqa bilim berý, qoǵamdyq kólik pen kommýnaldy sharýashylyq salalaryn tsifrovizatsiialaý, Ekibastuz qalasynda biliktilik ortalyǵyn ashý, Aqsý kentinde jylý qazandyǵyn iske qosý josparlanǵan. Qarajattyń bir bóligi Pavlodar oblysynda fýtboldy damytý men qoldaýǵa baǵyttalady.
Memorandýmǵa qol qoiý rásiminde sóz sóilegen oblys ákimi Ábilqaiyr Sqaqov ERG kompaniiasynyń basshylyǵy men barsha «eýraziialyqtarǵa» óńirdiń damýyna qosqan úlesi úshin alǵys aitty. Onyń aitýynsha, kompaniia jyl saiyn oryndaityn mindetter Eýraziialyq Toptyń áleýmettik jaýapkershiliginiń joǵary deńgeiin aiǵaqtaidy.
– Sońǵy 8 jyl ishinde ERG aimaǵymyzǵa 20 milliard teńgeden astam qarajat bólgen. Osynyń arqasynda kóptegen áleýmettik nysandar jóndelip, jańadan salynyp, qoǵamnyń igiligi men berekesi úshin qyzmet etýde. Búgin qol qoiǵan ózara seriktestik týraly Memorandým bul tájiribeniń jalǵasy bolmaq, – dedi Ábilqaiyr Sqaqov.
Aleksandr Mashkevich memorandým aiasynda qarjylandyrylatyn jobalardyń ózektiligine nazar aýdaryp, olardyń tiimdiligi men bolashaqta tigizer úlken paidasyna senim bildirdi.
– Bul zamanaýi ári jańa jobalar jáne búgingi álem osyndai sheshimdersiz ómir súre almaidy. Biz Pavlodar oblysy turǵyndarynyń ómirin sapaly ózgertetin jobalardy barynsha jyldam júzege asyratyn bolamyz, – dedi ERG direktorlar Keńesiniń basshysy.
Biyl Pavlodar oblysynyń aýdandary men qalalarynyń damýy men qoldaýyna baǵyttalǵan 36 jobaǵa biýdjetten 3,5 mlrd teńge qarastyrylǵan.
