Batys Qazaqstan oblysynda qyzmettik kólikti mas kúide basqarǵan aýyl ákimine qatysty tártiptik is qaralyp, ony qyzmetinen bosatý usynyldy, dep habarlaidy dalanews.kz.
Ádep jónindegi keńeste Aqjaiyq aýdany Chapaev aýyldyq okrýginiń ákimi Bibolat Zinýllinge qatysty tártiptik is qaraldy. Onyń jumys ýaqytynda qyzmettik avtokólikti alkogoldik masań kúide basqarǵany anyqtalǵan.
«Oqiǵa 12 naýryz kúni bolǵan. Ákimdi ózi basqaratyn Chapaev aýyldyq okrýginiń aýmaǵynda politsiia qyzmetkerleri toqtatqan. Osy fakti boiynsha ákimshilik hattama toltyrylǵan», – dedi BQO boiynsha Memlekettik qyzmet isteri agenttigi departamenti basshysynyń orynbasary Dáýren Hairov.
Onyń aitýynsha, bul jaǵdai agenttikke ákimshilik quqyq buzýshylyqtar bazasyn monitoringteý kezinde belgili bolǵan. Bastapqyda birinshi satydaǵy sot ákimniń paidasyna sheshim shyǵarǵanymen, keiin apelliatsiialyq instantsiia bul sheshimniń kúshin joiǵan.
Isti qaraý qorytyndysy boiynsha Ádep jónindegi keńes Bibolat Zinýllindi qyzmetinen bosatýdy usyndy.
Belgili bolǵandai, quqyq buzýshylyq jasalǵan kezde ákimniń tártiptik jazasy áli alynbaǵan. Buǵan deiin oǵan tolyq emes qyzmettik sáikestigi týraly eskertý berilgen.
Aita keteiik, ótken jyldyń qazan aiynda Ádep jónindegi keńes Zinýllinge qatysty taǵy bir isti qaraǵan. Ol kezde ákimge qurylysy aiaqtalmaǵan nysan úshin biýdjet qarajatyn aýdardy degen aiyp taǵylǵan bolatyn.
