Ishki ister ministriniń birinshi orynbasary Baýyrjan Álenov 16 jastaǵy Sherzattyń ákesi men jaqyndaryna qoqan-loqy kórsetkenderge qatysty qylmystyq is qozǵalǵanyn málimdedi, dep habarlaidy Dalanews.kz.
“Bul derek boiynsha qylmystyq is qozǵaldy. Tergeý ádil túrde júrgiziledi”, – dep ýáde berdi Álenov.
Onyń aitýynsha, Ishki ister ministrliginiń ókilderi qoqan-loqy faktisi boiynsha jábirlenýshi tarappen sóilesken. Búgin jaýap alý josparlanǵan. Jaýap alý barysynda Sherzattyń ákesi Qarjaýbaiǵa kimniń qoqan-loqy kórsetkeni anyqtalatyny aityldy.
Eske salaiyq, buǵan deiin marqum Sherzattyń ákesi Qarjaýbai Nurymov ózine áldekimderdiń birneshe ret qoqan-loqy kórsetkenin málimdep, úndeý jasaǵan edi.
“Meni bir emes, birneshe ret qorqytty. Alyp ketýler boldy. Telefonmen de. “Zańgermiz, advokatpyz, birge oqyp edik” dep kelip, aldap, meni dalaǵa shaqyryp alyp, qorqytýlar bolǵany ras”, - dedi marqumnyń ákesi.
Osy tusta ol ashyq sotty talap etetinin jetkizdi.
“Halqymnan suraitynym – esh qan tógilmesin. Ashyq sot bolýyn talap etem. Ashyq sot bolsa, oń sheshim bolady. Esh arandatýǵa túspeńizdershi. Analar jylamasyn, balalardyń qany tógilmesin. Baýyrlarym, jigitter, arandamaiyqshy, aldanyp qalmaiyq. Joǵarydaǵy aǵalar da zań aiasynda qolǵa alyp jatyr. Erteń Astanadan, IIM-nen adam keledi dep aityldy. Sol aitarym. Balam óldi. Endi men basqa balalardyń bolashaǵy jaqsy bolsyn dep tileimin. Nietim de, armanym da osy”, - dedi ol.
