Marketpleister «Qazaqstanda jasalǵan» tańbasy bar taýarlardy ilgeriletýge mindetteledi, dep habarlaidy dalanews.kz.
«Qazaqstanda jasalǵan» tańbasyna qoiylatyn talaptar endi tek saýda jelilerine ǵana emes, onlain-platformalarǵa da qoldanylmaq. QR Saýda jáne integratsiia ministrligi otandyq taýarlardy oflain-bólshek saýdada da, elektrondy kommertsiiada da ilgeriletý talaptaryn kúsheitip jatyr.
Marketpleister úshin qazaqstandyq ónimderdi izdeý nátijelerinde basym kórsetý jáne «Qazaqstanda jasalǵan» arnaiy bólimderin qurý boiynsha mindetti tetikter engiziledi. Qazirgi ýaqytta tiisti zańnamalyq túzetýler paketi múddeli memlekettik organdarmen kelisýden ótýde. Bul týraly QR Saýda jáne integratsiia ministriniń mindetin atqarýshy Aijan Bijanova «Saýda jelilerinde «Qazaqstanda jasalǵan» ulttyq brendin ilgeriletý» taqyrybyndaǵy dóńgelek ústelde málimdedi.
Jańa talaptar otandyq óndirýshilerdi qoldaýǵa baǵyttalǵan memlekettik saiasattyń mańyzdy bóligine ainalyp otyr. Qoldanystaǵy zańnamaǵa sáikes, saýda nysandarynda qazaqstandyq taýarlardyń úlesi keminde 30 paiyz bolýy tiis. Budan bólek, «Damý» qorynyń qoldaý baǵdarlamalary aiasynda sóre keńistiginiń taǵy 20 paiyzyna deiin otandyq ónimge bólinýi múmkin. Osylaisha, qazaqstandyq taýarlar dúken assortimentiniń jartysyna deiin qamtýǵa múmkindik alady.
«Sonymen qatar, tutynýshynyń otandyq ónimdi kórýi de mańyzdy. Sondyqtan zańnama tek sandyq kórsetkishterge ǵana emes, taýardy ornalastyrý sapasyna da talap qoiady. Otandyq óndirýshilerdiń ónimi satyp alýshynyń kóz deńgeiinde, qoljetimdi jerde ornalasýy tiis. Bul — «altyn sóre». Satyp alýshy eń aldymen dál osy sóredegi taýarǵa nazar aýdarady. Qazaqstandyq óndirýshi mundai orynǵa laiyq dep esepteimin», - dedi Aijan Bijanova.
Mundai tásilderdiń tiimdiligin Nazarbaev Ýniversiteti janyndaǵy Ulttyq analitikalyq ortalyq júrgizgen eksperiment nátijeleri de kórsetti. Magnum saýda jelisimen birlesip, zertteýshiler qazaqstandyq irimshikterdi ilgeriletýge arnalǵan minez-qulyqtyq quraldardy synaqtan ótkizdi. Joba minez-qulyq ǵylymy salasyna mamandanǵan britandyq Behavioural Insights Team kompaniiasynyń ádisnamalyq qoldaýymen júzege asyryldy.
Dúkenderde bannerler, sóre bólgishteri, stikerler, sóre lentalary jáne «Qazaqstanda jasalǵan» tańbasyna nazar aýdartatyn aýdiohabarlamalar qoldanyldy. Eksperiment tórt apta boiy naqty satyp alý ortasynda júrgizildi.
Nátije halyqaralyq kórsetkishterden joǵary boldy. Pilottyq dúkenderde qazaqstandyq irimshik satylymy 20 paiyzǵa artqan. Salystyrmaly túrde alǵanda, álemdik tájiribede mundai minez-qulyqtyq quraldardyń ortasha áseri shamamen 8 paiyz bolady.
«Biz minez-qulyqtyq quraldardy qazaqstandyq jaǵdaida irimshik mysalynda synap kórýdi jón kórdik. Irimshik negizgi azyq-túlik taýarlarynyń qataryna jatady, alaida bul segmentte import úlesi joǵary — 47 paiyz. Eksperimenttiń nebári tórt aptasynda pilottyq dúkenderdegi qazaqstandyq irimshik satylymy 20 paiyzǵa ósti. Bul — óte joǵary kórsetkish. Eksperiment nátijesi qazaqstandyqtardyń “ekonomikalyq patriotizmge” daiyn ekenin kórsetti. Ol úshin tutynýshyǵa dúkende tańdaý jasaýǵa kómektesý qajet, iaǵni ónimdi tanymal ári kózge kórinetin etý kerek», - dedi Ulttyq analitikalyq ortalyqtyń Memlekettik basqarý jáne minez-qulyqtyq memlekettik saiasat ortalyǵynyń direktory Saltanat Djanenova.
Ministrlik talaptardyń saqtalýyna baqylaýdy da kúsheitpek. Zańnama talaptarynyń buzylýy týraly shaǵymdar jospardan tys tekserýler júrgizýge negiz bola alady. Otandyq taýarlardyń saýda jelilerine qoljetimdiligin shekteý, nusqamalardy oryndamaý jáne jetkizýshilermen jumys talaptaryn buzý faktileri úshin aiyppul qarastyrylǵan.
Sonymen qatar, Saýda jáne integratsiia ministrligi jańa zańnamalyq ózgerister ázirlep jatyr. Atap aitqanda, «ónimsiz deldal» uǵymyn engizý, saýda kedergilerine baqylaýdy kúsheitý jáne bos saýda oryndary bolǵan jaǵdaida otandyq óndirýshilerge saýda alańdaryna qoljetimdilik berýdi mindetteý josparlanǵan.
