Marafonshy, qazir túrmede otyrǵan Marat Jylanbaevqa Stepnogorskidegi túzetý mekemesinde qysym kórsetilip jatyr. Bul týraly onyń advokaty Meiirjan Dosqaraev málimdedi, dep habarlaidy Dalanews.kz.
Advokattyń aitýynsha, Jylanbaev 26 naýryz ben 4 mamyr aralyǵynda uzaqqa sozylǵan ashtyq jariialaǵan. Ashtyqtyń saldarynan densaýlyǵy nasharlap, keiin jazalaý izoliatoryna (DIZO) ornalastyrylǵan.
“Onyń basty talaptarynyń biri — jazǵan aryz-shaǵymdarynyń mekeme shekarasynan syrtqa shyqpaýy. №4 túzetý mekemesinde shaǵym qabyldaityn arnaiy terminaldar bar, alaida Maratty solarǵa jibermeidi. Advokat retinde men de aryz-shaǵymdaryn syrtqa jiberýge múmkindik ala almai otyrmyn, qujattardyń bárin zańsyz tartyp alyp, “Advokattyq qyzmet týraly” zań men advokattyq qupiiany óreskel buzyp otyr”, — deidi Dosqaraev.
2024 jyldyń basynda Aqmola oblysy boiynsha QAJD basshysynyń ruqsatymen Maratqa tokarlyq qural-jabdyqtar men sýret salýǵa arnalǵan boiaýlar, qylqalamdar jáne basqa da jeke zattar jetkizilgen bolatyn. Óitkeni ol — tórtinshi razriadty tokar jáne sýretshi. Alaida sol jyldyń sońynda belgisiz sebeptermen oǵan bul ispen ainalysýǵa tyiym salynǵan. Qansha ret ashtyq jariialasa da, bul quqyqtary áli qalpyna keltirilmedi. Tipti jeke jazbalary da tárkilengen.
Advokat 21 mamyrda Stepnogorsk qalasyndaǵy túzetý mekemesinde Maratpen kezdesken. Onyń aitýynsha, Marattyń ombýdsmenge joldaǵan aryzy men sáýir aiynyń basynda advokatqa arnaǵan haty mekemeden syrtqa shyqpaǵan.
“Oǵan jasalatyn qysym kúnnen-kúnge údei túsýde. Sońǵy saparymda densaýlyǵynyń ashtyqtan áli qalpyna kelmegenin aitty. Óziniń zańdy talaptaryn aitqany úshin ony qysymmen tunshyqtyrýǵa tyrysýda. Mysaly, ashana men DIZO aralyǵynda ornalasqan shuńqyr túrli ziiankes jándikterge toly. Oǵan júgiretin jer de berilmeidi. Saldarynan Marat májbúrli túrde ashtyqqa qaita oralady. Sonymen qatar maǵan, iaǵni advokatyna, tikelei habarlasa almaidy. Mundai tyiym zańda joq. Endi ol, ashtyq nátije bermegendikten, kelesi joly ózin jaraqattaýǵa májbúr bolatynyn aitty. Óitkeni ótken jyly alty márte, biyldyń ózinde ekinshi ret ashtyq jariialap otyr”, — deidi qorǵaýshy.
Advokattyń málimdeýinshe, 2025 jyldyń sáýir aiynyń sońynda Marat monshaǵa ketken kezde, onyń kamerasynan 30-40 bet kólemindegi jeke jazbalary joǵalyp ketken.
“DIZO-ǵa qamalǵanda Marattyń qan qysymyn ólsheitin qurylǵysyna deiin alyp qoiǵan. Túrme ákimshiligi ony syrt álemnen tolyq oqshaýlaýǵa tyrysyp jatyr, tipti meniń de jazbalarymdy baqylaýǵa alǵan”, — dedi Meiirjan Dosqaraev.
Aita keteiik, buǵan deiin Qazaqstandyq ýltramarafonshy, sýretshi, oppozitsioner, júgirýden halyqaralyq dárejedegi sport sheberi Marat Jylanbaevtyń túrmeden jazǵan haty jariia bolǵan edi.
Quqyq qorǵaýshy Baqytjan Tóreǵojinaáleýmettik jelide qazir túrmede ashtyq jariialap jatqan marafonshy Marat Jylanbaevtyń hatyn jariialady. Hat Aqmola oblystyq prokýroryna joldanǵan. Onda Jylanbaev “ashtyqty emdik maqsatta jariialap otyr” degen aqparatty joqqa shyǵaryp, “bul baryp turǵan jalǵandyq” dep málimdeidi.
– 18 qańtarda aýzymdy skrepkamen tiktim. Sol jyly 5 ai boiy – 151 kún ashtyqta boldym. Bul meniń altynshy ashtyq jariialaýym. Qazir munda maǵan shyǵarmashylyqpen ainalysýǵa da, stadionda júgirýge de múmkindik bermei otyr. Barlyq jumys quraldarymdy tartyp aldy. 5 sáýir kúni jýynýǵa ketkenimde tártiptik izoliatorda qaǵazdarym joǵalyp ketken.18 aqpanda qaqpannan 29-tyshqandy ustadym. Meniń ashtyǵym – bul meni zańsyz qamaýǵa alǵan júiege qarsylyǵym. Halyqaralyq quqyq qorǵaý uiymdary meni saiasi tutqyn dep tanydy, – delingen hatta.
Hat 7 sáýirde jazylǵanymen, ony quqyq qorǵaýshy 15 sáýir kúni jariialaǵan.
Aita keteiik, 26 naýryzda Marat Jylanbaev sot úkimine jáne túrmede ózine jasalǵan qysymǵa bailanysty ashtyq jariialaǵan bolatyn. Advokatynyń aitýynsha, 5 sáýirde ol mekeme ákimshiliginiń áreketine narazylyq retinde aýzyn tigip, prokýror kelgen soń birneshe saǵattan keiin tikken jerin sheship tastaǵan. Buǵan deiin Aqmola oblysy QAJD Jylanbaevtyń sot sheshimimen kelispeýine bailanysty ashtyq týraly ótinish bergenin aitqanymen, onyń naqty ashtyq jariialaǵanyn rastaǵan joq.
