Byltyr topan sýdan zardap shekken Maqtaaral aýdany Órgebas aýylynyń turǵyndary Mańǵystaý oblysyna 1 vagon mal azyǵy shóp jóneltti. Ol Jańaózendegi shóp jetispeýshiliginen qıyndyqqa tap bolǵan sharýalarǵa tegin úlestiriledi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Aýdannyń «Qurmetti azamaty» Erejep Qanaevtyń bastamasymen aýyl halqy 1,6 mıllıon teńgeden astam qarjy jınap, qoldaǵy qarajatqa 1 100-ge jýyq nyǵyzdalǵan shóp (pres) satyp alynǵan. Sondaı-aq, aýyldyń 30-dan astam jigitteri Saryaǵash aýdanyndaǵy Qurmet Talapqazy bastaǵan eriktiler tobyna qosylǵan. Jaqsylyqqa jany qumar jandardyń aıtýynsha, qıyn sátte bir-birimizge qoldaý kórsetý — azamattyq paryz.

Maqtaly óńirde oryn alǵan sý tasqyny kezinde zardap shekken azamattarǵa respýblıkanyń túkir-túkpirinen kómek kórsetilgeni el esinde. Sondyqtan jerlesteriniń ystyq yqylasyna bólengen Órgebas aýylynyń turǵyndary syn saǵatta árbir qazaqstandyqqa qoldaý kórsetýge ázir.

Máselen, aýdan turǵyndary buǵan deıin de qatty daýyldan japa shekken Otyrar aýdanyna 1 mıllıon teńgeden astam qarjylaı kómek kórsetken.