Maqtaaral men Saryaǵashta Soltústik óńirleriniń bos jumys oryndary jármeńkesi ótti
Ońtústik Qazaqstan oblysynda elimizdiń Qostanai, Pavlodar, Soltústik Qazaqstan, Shyǵys Qazaqstan oblystarynan kelgen bir top delegatsiia túrli baǵdarlamalar aiasynda halyqpen kezdesýler ótkizýde. Teriskeilik 60-tan astam ókildiń qatysýymen bolǵan jiyndar kesheli beri Maqtaaral men Saryaǵash aýdandarynda uiymdastyrylyp jatyr. Onda jumyssyzdarǵa arnalǵan «Óńiraralyq bos jumys oryndary jármeńkesi» men mektep bitirýshi túlekter úshin «Serpin» baǵdarlamasy boiynsha túsindirý jumystary júrgizildi. Delegatsiia quramy oblys ákimderiniń orynbasarlary, aýyl okrýgi ákimderi, jumyspen qamtý salasynyń ókilderi men jumys berýshilerinen turady.
«Soltústik Qazaqstan oblysynda 7 mln gektardan astam jer bar. Bul búkil Qazaqstan boiynsha eń úlken egistik jer bizde degen sóz. Degenmen, bizdiń óńir eńbek kúshinen tapshylyq kórýde. Dál sol sebepti 300 myń turǵyny bar Maqtaaral aýdanynan jumys izdegen azamattardy oblysymyzǵa tartqymyz keledi. Ol úshin arnaiy baǵdarlamalar bar. Bizdiń usynystarymyz unap, jumys isteý úshin soltústikke kóshetinderge úi, jer berilip, kásibi, sharýashylyǵy ári qarai damýy úshin túrli kómekter kórsetemiz. Sondai-aq, pedagogikalyq, tehnikalyq t.b. mamandyqtar boiynsha bos oryndar kóp. Byltyr OQO-dan 200-dei otbasy kóship bardy. Búginde olar ózderiniń otbasylyq kásibin damytyp, qanattaryn keńge jaiyp otyr» – dedi SQO-nyń Aýyl sharýashylyǵy basqarmasy basshysynyń orynbasary Altynbek Abdollaev kópshilikpen bolǵan kezdesýde.
Teriskeidiń ókilderi Maqtaaral aýdanynda 1000-nan asa aýdan turǵyndaryna aýyl sharýashylyǵy, pedagogika, tehnika t.b. salalar boiynsha bos jumys oryndaryn usynyp, «Serpin» baǵdarlamasy boiynsha soltústik óńirlerdiń joǵary oqý oryndarynda grantpen oqi alatyndyǵy jóninde 200 jasqa túsindirip berdi. Nátijesinde, 97 maqtaaraldyq azamat otbasymen soltústik óńirlerge kóshýge niet bildirip otyr.
Saryaǵashtyń halqymen ótken kezdesý de óz jemisin bergen. 500-ge jýyq aýdan turǵynymen bolǵan jármeńkege 600-den astam jumys berýshi qatysyp, 800-ge jýyq bos jumys oryndaryn usyndy. Jiyn nátijesinde, saryaǵashtyq 124 otbasy Qostanai, Pavlodar, SQO jáne ShQO-ǵa qonys aýdarýǵa niettendi.
Eske salsaq, Saryaǵash aýdanynan Soltústik Qazaqstan, Shyǵys Qazaqstan, Qostanai oblystaryna «Jumyspen qamtý 2020 jol kartasy» baǵdarlamasy sheńberinde 2015 jyly 12 otbasy, 2016 jyly 59 otbasy, jalpy 71 otbasy (306 januia múshelerimen) qonys aýdardy. Qonys aýdarǵan azamattar sol óńirlerden jeke turǵyn úi alyp, otbasynyń jumysqa jaramdy azamattary tolyǵymen jumyspen qamtylǵan.
Aita keteiik, óńiraralyq bos jumys oryndarynyń jármeńkesi erteń, 5 sáýir kúni Shymkent qalasynda jalǵasyn tabady.
OQO ákiminiń baspasóz qyzmeti
