«سولتۇستىك قازاقستان وبلىسىندا 7 ملن گەكتاردان استام جەر بار. بۇل بۇكىل قازاقستان بويىنشا ەڭ ۇلكەن ەگىستىك جەر بىزدە دەگەن ءسوز. دەگەنمەن، ءبىزدىڭ ءوڭىر ەڭبەك كۇشىنەن تاپشىلىق كورۋدە. ءدال سول سەبەپتى 300 مىڭ تۇرعىنى بار ماقتاارال اۋدانىنان جۇمىس ىزدەگەن ازاماتتاردى وبلىسىمىزعا تارتقىمىز كەلەدى. ول ءۇشىن ارنايى باعدارلامالار بار. ءبىزدىڭ ۇسىنىستارىمىز ۇناپ، جۇمىس ىستەۋ ءۇشىن سولتۇستىككە كوشەتىندەرگە ءۇي، جەر بەرىلىپ، كاسىبى، شارۋاشىلىعى ءارى قاراي دامۋى ءۇشىن ءتۇرلى كومەكتەر كورسەتەمىز. سونداي-اق، پەداگوگيكالىق، تەحنيكالىق ت.ب. ماماندىقتار بويىنشا بوس ورىندار كوپ. بىلتىر وقو-دان 200-دەي وتباسى كوشىپ باردى. بۇگىندە ولار وزدەرىنىڭ وتباسىلىق كاسىبىن دامىتىپ، قاناتتارىن كەڭگە جايىپ وتىر» – دەدى سقو-نىڭ اۋىل شارۋاشىلىعى باسقارماسى باسشىسىنىڭ ورىنباسارى التىنبەك ابدوللايەۆ كوپشىلىكپەن بولعان كەزدەسۋدە.
تەرىسكەيدىڭ وكىلدەرى ماقتاارال اۋدانىندا 1000-نان اسا اۋدان تۇرعىندارىنا اۋىل شارۋاشىلىعى، پەداگوگيكا، تەحنيكا ت.ب. سالالار بويىنشا بوس جۇمىس ورىندارىن ۇسىنىپ، «سەرپىن» باعدارلاماسى بويىنشا سولتۇستىك وڭىرلەردىڭ جوعارى وقۋ ورىندارىندا گرانتپەن وقي الاتىندىعى جونىندە 200 جاسقا ءتۇسىندىرىپ بەردى. ناتيجەسىندە، 97 ماقتاارالدىق ازامات وتباسىمەن سولتۇستىك وڭىرلەرگە كوشۋگە نيەت ءبىلدىرىپ وتىر.
سارىاعاشتىڭ حالقىمەن وتكەن كەزدەسۋ دە ءوز جەمىسىن بەرگەن. 500-گە جۋىق اۋدان تۇرعىنىمەن بولعان جارمەڭكەگە 600-دەن استام جۇمىس بەرۋشى قاتىسىپ، 800-گە جۋىق بوس جۇمىس ورىندارىن ۇسىندى. جيىن ناتيجەسىندە، سارىاعاشتىق 124 وتباسى قوستاناي، پاۆلودار، سقو جانە شقو-عا قونىس اۋدارۋعا نيەتتەندى.
ەسكە سالساق، سارىاعاش اۋدانىنان سولتۇستىك قازاقستان، شىعىس قازاقستان، قوستاناي وبلىستارىنا «جۇمىسپەن قامتۋ 2020 جول كارتاسى» باعدارلاماسى شەڭبەرىندە 2015 جىلى 12 وتباسى، 2016 جىلى 59 وتباسى، جالپى 71 وتباسى (306 جانۇيا مۇشەلەرىمەن) قونىس اۋداردى. قونىس اۋدارعان ازاماتتار سول وڭىرلەردەن جەكە تۇرعىن ءۇي الىپ، وتباسىنىڭ جۇمىسقا جارامدى ازاماتتارى تولىعىمەن جۇمىسپەن قامتىلعان.
ايتا كەتەيىك، ءوڭىرارالىق بوس جۇمىس ورىندارىنىڭ جارمەڭكەسى ەرتەڭ، 5 ءساۋىر كۇنى شىمكەنت قالاسىندا جالعاسىن تابادى.
وقو اكىمىنىڭ باسپا ءسوز قىزمەتى
