Mańyzdy máseleler talqylandy
Áskeri keńes otyrysyn ashqan óńirlik qolbasshylyq qolbasshy general-maior Q.Aqtanov aldymen Ulttyq ulan men onyń óńirdegi quramalaryna memleket tarapynan júktelgen mindettemelerdiń mańyzdylyǵyna toqtaldy. Sondai-aq, jyl basynda Ulttyq ulan Bas qolbasshylyǵynda ótken alqa jinalysynda áskeri vedomstonyń jumysyn jetildirý boiynsha IIM men Ulttyq ulan Bas qolbasshylyǵy tarapynan qoiylǵan naqty tapsyrmalardy sapaly oryndaý kún tártibindegi ózekti másele bolyp sanalatyndyǵyn atap aitty. Jáne de bul jumystardyń barlyǵy da qysqa merzim aralyǵy men qarajatty qatań ekonomikalyq únemdeý arqyly júzege asýy tiis ekenine basa nazar aýdardy. Osy oraida qolbasshy el biýdjetinen bólingen árbir teńge josparlanǵan is-sharalar úshin utymdy ári tiimdi paidalanylyp, qandai da bolsyn rásýalyqqa jol bermeý qajet dep atap ótti.
Óz kezeginde, Ulttyq ulan Bas qolbasshysynyń orynbasary general-maior M.Satov ásker quramy elorda tórinde ótetin úlken jumys atqaryp otyrǵandyǵyna, EHRO-2017 halyqaralyq kórmesi kezinde ózge ishki ister organdarymen qanattasa otyryp, qaýipsizdik sharalaryn qamtamasyz etetip jatqandyǵyna toqtaldy. Osy elimiz úshin bir jaǵynan abyroily da, bir jaǵynan syndarly sátte, syrttan kóptep kelip jatqan týrister qaýymynyń aldynda qyzmetti qaiaý túsirmei atqarý qatardaǵy jaýyngerden bastap, generaldarǵa deiin zor syn dep atap ótti.
Munan soń jiynda óńirlik qolbasshylyq jeke quramynyń jartyjyldyq qyzmettik-jaýyngerlik is-áreketi jaily qolbasshylyqtyń Bas shtabynyń bastyǵy general-maior Andrei Qaskelenov, sondai-aq áskeri tártip, tehnika jaiy, tyl qyzmetiniń jai-kúii jaily qolbasshysynyń orynbasarlary polkovnikter S.Súleimenov, N.Kópeev, A.Jýkov baiandama jasady.
Alqaly jiyn sońynda naqty tapsyrmalar berilip, qyzmettiń jetistikteri aitylyp, olqy tustary synaldy. Aldaǵy merzimge baǵyttalǵan jumys josparlary pysyqtaldy. Sońynan jarty jyl boiynda qyzmetin úlgili atqaryp, joǵary nátijeleri kórsetken qyzmetkerlerge alǵys jariialanyp, qurmet kórsetildi. Sondai-aq, qyzmettiń barlyq jaǵy boiynsha alǵa shyǵyp, el úshin ekpindi eńbek úlgisin kórsete alǵan áskeri bólimder – Shymkent qalasyndaǵy 6506 áskeri bólimi – birinshi, Taldyqorǵandaǵy 5514 áskeri bólimi – ekinshi, Almatydaǵy 5571 áskeri bólimi – úshinshi orynǵa ie boldy.
Maior Arman ÁÝBÁKIROV,
Almaty qalasy
