Mańǵystaý oblysynda bolǵan jol apatynan Atyraýdan shyqqan kópbalaly otbasynyń otaǵasy kóz jumyp, áieli men tórt balasy túrli jaraqat aldy, dep habarlaidy dalanews.kz.
Qaiǵyly oqiǵa 28 shildede Shetpe – Saiótes tasjolynda bolǵan. Aldyn ala málimet boiynsha, Chevrolet Cobalt kóliginiń júrgizýshisi rólge ie bola almai, joldan shyǵyp ketip, kólik aýdarylǵan.
Jol apaty saldarynan otaǵasy oqiǵa ornynda qaza tapqan. Al onyń jubaiy men tórt balasy jaraqat alǵan.
Eń aýyr jaraqatty 15 jastaǵy qyz alǵan. Ol sanitarlyq aviatsiia arqyly asa aýyr jaǵdaida Mańǵystaý oblystyq balalar aýrýhanasyna jetkizilgen.
Sondai-aq 13 jastaǵy jasóspirimniń de jaǵdaiy óte aýyr. Dárigerler onyń búiregi soǵylyp, aýqymdy gematoma alǵanyn anyqtaǵan.
Jeti jastaǵy balany da aýrýhanaǵa jatqyzý usynylǵan. Alaida anasy kúieýiniń jerleý rásimine qatysý úshin shuǵyl túrde Atyraýǵa barýy qajet ekenin aityp, emdeýden jazbasha túrde bas tartqan. Dárigerler oǵan mundai sheshimniń saldary bolýy múmkin ekenin eskertken.
Al bes jastaǵy balanyń jaǵdaiy turaqty bolǵandyqtan, ol anasymen birge aýrýhanadan shyǵarylǵan.
