Mańǵystaý oblysynyń qylmystyq ister jónindegi mamandandyrylǵan aýdanaralyq soty bes balanyń ákesi, 52 jastaǵy ańshy Aslan Qydyrbaevtyń ólimine qatysty rezonansty is boiynsha sottalǵan tulǵalarǵa Qazaqstan Respýblikasy Qylmystyq kodeksiniń qandai baptary qoldanylǵanyn habarlady, dep dalanews.kz tilshisi Lada.kz saityna silteme jasap habarlaidy.
Sottyń baspasóz qyzmeti málim etkendei, alqabiler alqasynyń úkimimen istiń negizgi figýranty QR Qylmystyq kodeksiniń 99-baby 1-bóligi – "Adam óltirý" jáne 337-baby 3-bóligi – "Zańsyz ańshylyq" boiynsha kináli dep tanyldy.
Oǵan túpkilikti 8 jyl bas bostandyǵynan aiyrý jazasy taǵaiyndalyp, 5 jyl merzimge ańshylyqpen ainalysý quqyǵynan aiyryldy.
Ekinshi figýrant QR QK-niń 337-baby 3-bóligi – "Zańsyz ańshylyq" jáne 432-baby – "Qylmysty jasyrý" boiynsha kináli dep tanyldy. Oǵan 3 jyl bas bostandyǵyn shekteý jazasy taǵaiyndalyp, 5 jylǵa ańshylyq qyzmetpen ainalysý quqyǵynan aiyryldy.
Úshinshi figýrant ta QR QK-niń 337-baby 3-bóligi jáne 432-baby boiynsha kináli dep tanyldy. Oǵan da 3 jyl bas bostandyǵyn shekteý jazasy berilip, 5 jyl merzimge ańshylyqpen ainalysýǵa tyiym salyndy.
Sonymen qatar sot jábirlenýshi taraptyń moraldyq ziiandy óteý jónindegi azamattyq talabyn ishinara qanaǵattandyrdy. Al materialdyq zalaldy óteý týraly talap tolyq kólemde qanaǵattandyryldy.
Buǵan deiin alqabiler shyǵarǵan úkim marqumnyń týystarynyń narazylyǵyn týdyrǵan edi. Olar is boiynsha bir figýranttyń 8 jylǵa sottalyp, taǵy eki adamnyń sot zalynan bosatylǵanymen kelispeitinderin málimdegen.
