Oblystyq tujyrymdamaǵa sáikes, naýryz aiynyń ár kúnine ataý qoiylyp, taqyrypqa sai is-sharalar uiymdastyrylýda.
1 naýryz – Alǵys aitý kúni
2 naýryz – Jastar kúni
3 naýryz – Urpaq sabaqtastyǵy kúni atalyp ótti.
Naýryzdyń 4-i - Qazaqtyń ulttyq kiimi kúni bolyp belilendi
Bul ideiany oblys jurtshylyǵy jyly qabyldap, kópshilikten qoldaý tapty. Búgin oblystaǵy barlyq memlekettik mekemeler, kásiporyndar, úkimettik emes uiymdar, etno-mádeni ortalyqtar, qoǵamdyq birlestikter ókilderi, jastar barlyǵy ulttyq kiimder kiip júrdi. Muǵalim, tárbieshi, dáriger, esepshisi bar, kópshilik túgel kestelengen, oiýlanǵan beshpet, qamzoldarymen jumysta júr. Osylaisha beiresmi mereke júzege asty. Bul árine dástúrge degen qurmet.
Ata dástúrdiń qaimaǵy buzylmaǵan Mańǵystaý óńiriniń jurtshylyǵy úshin ulttyq kiimdi kiip júrý tańsyq emes. Toi-jiyndarda ájeler, analar, qyz-kelinshekter qajekei, qamzolyn tastamaidy. Desek te salt-dástúr, ádet-ǵurpymyzdy dáripteý maqsatynda ulttyq kiim kúni atalyp ótti.
Ultymyzdyń kiimin tanymal etýge óńirdegi dizainerler men qolóner sheberleri de úles qosyp keledi. Sońǵy jyldary ulttyq kiim tigetin tigin sheberhanalarynyń sany artqan. Olar umyt bola bastaǵan ulttyq kiimderimizdi qaita jańǵyrtyp, jańasha úlgide tigýde. Mańǵystaýlyq sheberlerdiń ónimine elimizdiń ózge óńirlerinen de, shet memleketterden de suranys artýda.
Azamatqa aibat, qyzǵa kórik beretin ulttyq kiimderdi barsha halyq kise, jarasyp-aq keter edi. Mańǵystaýlyqtardyń bastamasy chellendj retinde ózge óńirlerge joldandy.
