Áleýmettik jelilerde Mańǵystaý oblysyndaǵy Boranqul aýylyndaǵy temirjol stansıasynda túsirilgen vıdeo tarady. Onda platformalarǵa tıelgen tankter men áskerı júk kólikteri bar júk poıyzy kórsetilgen. Beınejazba jelide jyldam tarap, óńir turǵyndarynyń arasynda túrli suraq týǵyzdy, dep habarlaıdy Dalanews.kz.
Qorǵanys mınıstrligi bul jaǵdaıǵa baılanysty pikir bildirip, eshqandaı tótenshe jaǵdaı joq ekenin aıtty. Vedomstvonyń málimetinshe, áskerı tehnıka artılerıalyq bólimshelerdiń oqý-jattyǵý sabaqtaryn ótkizý úshin polıgondardyń birine jetkizilip jatyr.
"Bul tehnıkanyń qozǵalysy jaýyngerlik daıyndyq jospary aıasynda júzege asyp jatyr. Mundaı tasymaldar dalalyq jattyǵýlar men oqý jıyndaryn ótkizý kezinde jıi qoldanylatyn qalypty tájirıbe", – dep habarlady Qorǵanys mınıstrligi Lada.kz redaksıasyna.
Mınıstrlik azamattardy tek resmı aqparat kózderine súıenýge shaqyrdy.
