“Qurmetti qazaqstandyqtar! Aýa raiynyń qolaisyzdyǵy men onyń saldary ońai bolmai tur.
Qazaqstannyń kóptegen óńirlerindegi erekshe ystyq aýa raiy qurǵaqshylyqqa ákep soqty.
Jaýyn-shashynnyń azdyǵynan Mańǵystaý oblysy qatty zardap shekti. Úkimet pen jergilikti atqarýshy organdar zardap shekken aimaqqa qoldaý kórsetip, qajetti jumystardy atqaryp jatyr.
Búkil el boiynsha eriktiler de qomaqty úles qosýda.
Aýyl sharýashylyǵy ministrliginiń qyzmetkerleri qolaisyz tabiǵi qubylystardan zardap shekken turǵyndar men fermerlerge kómek retinde, ózderiniń birkúndik jalaqylaryn Mańǵystaý oblysy ákimdiginiń uiymdastyrýymen qurylǵan arnaiy shotqa jiberedi.
Osyǵan orai, ministrlik barlyq menshik nysanyndaǵy eńbek ujymdaryn qiyn jaǵdaiǵa tap bolǵan otandastarymyzdy qoldaýǵa jáne qoldan kelgenshe kómek kórsetýge shaqyrady”, – dep jazylǵan ministrlik taratqan aqparatta.
Vedomstvonyń resmi saitynda aqsha aýdarýǵa arnalǵan rekvizitter kórsetilgen.
…
Buǵan deiin jańadan taǵaiyndalǵan Aýyl sharýashylyǵy ministri Erbol Qarashókeev Qyzylorda men Mańǵystaý óńirindegi qurǵaqshylyqtyń zardabyna toqtalǵan edi.
Ministr biylǵy jazda jaýyn-shashyn az bolary kútilgenin, muny bile tura daiyndyq jumystary júrgizilmegenin aitqan. Burynǵy basshylyq qýańshylyqqa erte bastan qamdanbaǵan.
“Bizge aýa raiynyń qubylýyna tótep beretin júieli sharalar qabyldaý kerek.
Birinshiden, egin alqaptaryn ártaraptandyrýdy jedel júrgizý qajet. Bul úshin sharýalar aýyspaly egis erejesin muqiiat saqtaýy kerek.
Ekinshi kezekte: jem-shópten tapshylyq kórmeý úshin sýarmaly jerdiń kólemin kóbeitý kerek. Sonyń aiasynda jem-jem daqyldaryn ósiretin tuqym sharýashylyǵyn jolǵa qoiǵan jón.
Úshinshiden, jaiylym jerlerdiń ónimdiligin arttyrýǵa jol ashatyn ǵylymi jobalardy qoldaý qajet. Jaiylym jerdiń aýmaǵyn ulǵaitý másele emes, másele - olardy sýarýǵa tirelip tur. Ministrlik bul problemany sheshýge bar kúshin jumsaidy”, – degen edi Qarashókeev.
