Mańǵystaý oblysyndaǵy Aqjigit aýylynyń turǵyndary Beineý aýdandyq politsiia bóliminiń bastyǵy Erkebulan Izkenovke ashyq hat joldap, aýyldaǵy oqýshylarǵa qatysty alańdaýshylyqtaryn bildirdi. Olardyń aitýynsha, bir top jas mektep oqýshylaryn qorqytyp, aqsha bopsalaýmen ainalysyp júr. Bul týraly jergilikti basylym jazdy, – dep habarlaidy Dalanews.kz.
Hatta oqýshylar úlkenderdiń tapsyrmasyn oryndaýǵa májbúr ekeni, al bas tartqandar soqqyǵa jyǵylatyny jazylǵan. Turǵyndar bul másele jaiynda ashyq aitýǵa júreksinýdiń arty qaiǵyly jaǵdaiǵa ákelip soqqanyn alǵa tartyp, aýylda tártip ornatýdy talap etti. Olar balalardyń kóshede erkin júrýin, qaýipten qoryqpai ómir súrýin qalaidy.
Úndeýge 24 otbasy qol qoiǵan. Barlyǵy da bul jaǵdai kez kelgen balanyń basynan ótýi múmkin ekenin aityp, alańdaýshylyq bildirip otyr.
8 sáýirde Aqjigitte 11-synypta oqityn jasóspirim jumbaq jaǵdaida kóz jumdy. Marqumnyń týystary onyń ólimine áldekimderdiń qatysy bar dep esepteidi.
Bul oqiǵa boiynsha qylmystyq is qozǵaldy. Politsiia kúdikti ustalǵanyn habarlady. Isti oblys prokýrory jeke baqylaýyna alǵan.
