Mańǵystaýda halyqty aýyz sýmen qamtý – basty nazarda
Onyń aitýynsha, óńirdi sýmen qamtýda táýligine 48,2 myń tekshe metr sý tapshylyǵy bar.
– Mańǵystaýda 4 sý kózi bar. Onyń birinshisi – «MAEK-Qazatomónerkásip» seriktestigi. Bul uiym, negizinen, Aqtaý qalasy men Túpqaraǵan aýdany Aqshuqyr, Saiyn Shapaǵatov eldi mekenderiniń turǵyndaryn sýmen qamtyp otyr. Ekinshi sý kózi – «Kaspii» sý tushytý zaýyty. Bul zaýyttyń óndiretin sýyn Munaily aýdany men Qaraqiia aýdany Quryq selosynyń turǵyndary tutynady. Úshinshi sý kózi – «Magistraldy sý aǵyzǵysy» JShS. Atalǵan uiym Beineý aýdany, Mańǵystaý aýdany, Jańaózen qalasy men Jetibai eldi mekeniniń halqyn sýmen qamtamasyz etedi. Sondai-aq, oblys aýmaǵynda paidalaný qory táýligine 14 800 m3 jer asty sýlary bar, – dedi Berdibek Qartbaev.
Spikerdiń málimetinshe, óńirdegi aýyz sý máselesin sheshý maqsatynda oblys ákiminiń tapsyrmasymen «Jol kartasy» ázirlendi. Osyǵan sáikes, aldaǵy ýaqytta birneshe sý tushytý zaýyty salynady.
– «Jol kartasy» aiasynda «Kaspii» sý tushytý zaýytynyń qýaty 40 myń tekshe metrge artady. Nátijesinde Mańǵystaý oblysynda qosymsha sý kózi paida bolady. Sondai-aq, Baiandy aýylyndaǵy sý tushytý qondyrǵysynyń qýatyn 3,5 tekshe metrge artý jumystary qolǵa alynǵan. «MAEK-Qazatomónerkásip» JShS-niń aýmaǵynda qýaty 24,0 myń tekshe metr sý tushytý qondyrǵysynyń qurylysyn salý josparda bar. «QazMunaiGaz» AQ Qarajanbas ken ornynda qýaty táýligine 17,0 myń tekshe metrlik sý tushytý zaýytynyń qurylysyn salý jobasyn iske asyramyz. «Kendirli» kýrorttyq aimaǵynda qýaty táýligine 50,0 myń tekshe metrlik sý tushytý zaýytynyń qurylysyn salý jobasyn iske asyrý josparlandy. Atalǵan jumystar aiaqtalsa, oblystaǵy aýyz sý máselesi tolyq sheshiledi, – dedi Berdibek Qartbaev.
Baspasóz konferentsiiasynda Aqtaý qalasyndaǵy aýyz sý máselesi jóninde qala ákiminiń orynbasary Serik Gýsman da aqparat berdi. Onyń málimetinshe, qaladaǵy sý jetispeýshiligin joiý maqsatynda 18 mamyr men 15 maýsym aralyǵynda qaladaǵy I satydaǵy birqatar kásipkerlik nysanǵa ýaqytsha aýyz sý berý toqtatylady.
– Bul týraly ákimdiktiń resmi paraqshalarynda habarladyq. Eger qajet bolǵan jaǵdaida II satydaǵy keibir nysandarǵa da shekteý qoiylady. Sebebi, halyqty aýyz sýmen qamtý – basty másele. «MAEK-Kazatomprom» JShS-niń sý daiyndaý qondyrǵysyndaǵy jóndeý jumystarynan keiin, turǵyn úilerge táýligine 50-52 myń tekshe metrge deiin aýyz sý beriledi, – dedi Serik Gýsman.
Brifingke «MAEK-Kazatomprom» JShS departament direktory Sábit Jelkúshinov te qatysty. Onyń aitýynsha, qazirgi tańda «MAEK Qazatomprom» JShS-niń sý daiyndaý qondyrǵysynda josparly jóndeý jumystary júrgizilýde. Osyǵan orai, qazir qalaǵa táýligine 40-42 myń tekshe metr aýyz sý berilýde, iaǵni qala boiynsha 5-7 tekshe metr sý jetispeýshiligi oryn alýda. Atalǵan jóndeý jumystary 15-maýsymǵa deiin aiaqtalady.
