Mańǵystaý oblysynda Ulttyq qaýipsizdik komiteti departamenti basshysynyń burynǵy orynbasary Denis Ankýdinov pen «Aqtaý halyqaralyq áýejaiy» AQ aviatsiialyq qaýipsizdik aýditory Konstantin Alferovke qatysty úkim shyqty, dep habarlaidy Dala News.
Qylmystyq ister jónindegi mamandandyrylǵan aýdanaralyq sot ekeýin de asa iri kólemde bopsalaý jasaǵany úshin kináli dep tanydy. Ankýdinovke qosymsha qyzmettik ókilettigin asyra paidalaný aiyby taǵylǵan.
Sot materialdaryna sáikes, 2023 jyldyń tamyzynda Ankýdinov Mańǵystaý oblysyndaǵy kásipkerden 500 myń dollar talap etý shemasyn uiymdastyrǵan. Tergeý nusqasy boiynsha, ol bul iske Alferovti tartqan. Qyzmettik múmkindikterin paidalanyp, kásipker men onyń jaqyndary týraly jeke jáne kásibi málimetter jinalǵan.
Keiin kásipkerge kompromat salynǵan konvert jiberilip, artynsha 500 myń dollar berý talaby qoiylǵan. Fotosýretterdiń biriniń artynda «500 000» degen jazý bolǵany sotta aityldy.
Kásipker kezdesýge keliskenimen, kúdiktilerge 500 myń teńge ǵana bergen. Aqsha berilgen sátte ekeýi de ustalǵan.
Sot úkimimen Ankýdinov 11 jylǵa, al Alferov 8 jylǵa bas bostandyǵynan aiyryldy. Sonymen qatar sottalǵandardan jábirlenýshiniń paidasyna 1 mln teńge moraldyq ótemaqy jáne shamamen 3 mln teńge sot shyǵyndary óndirildi.
Úkim ázirge zańdy kúshine engen joq.
