Jiynǵa QR Ekologiia ministrligi Balyq sharýashylyǵy komitetiniń akvaósirýdi damytý basqarmasynyń basshysy Miras Ǵabbasov, Atyraý, Qaraǵandy, Túrkistan, Almaty, Mańǵystaý oblystarynyń kásipkerleri, aýdan ákimderi, memlekettik organdardyń basshylary qatysty.
Óz kezeginde sharaǵa qatysýshylar balyq sharýashylyǵynyń ekonomikadaǵy mańyzdy salalardyń biri bolyp tabylatynyn, ekonomikalyq ósim men halyqty jumyspen qamtýdyń negizi ekenin atap ótti.
Mamandardyń aitýynsha, balyq sharýashylyǵyn odan ári damytý úshin úlken múmkindikter bar. Dese de, bul protseske kedergi keltirip otyrǵan birqatar máseleler bar ekeni málim boldy. Aitalyq, kásipkerler balyq saqtaityn arnaiy muzdatqysh qoimalardyń joqtyǵyn, sondai-aq bilikti mamandardyń tapshylyǵyn da qol bailaý bolyp otyrǵanyn jetkizdi.
– Kadr jetispeýshiliginen bólek, elimizde óndiriletin balyq jeminiń jaǵdaiyn da talqylaýymyz kerek. Ókinishke orai, sapasy tómen bolǵandyqtan, biz jemdi shetelden satyp alýǵa májbúrmiz. Bul túpkilikti ónimniń ózindik qunyna áser etedi, – deidi kásipker Tursyngúl Jaqypova.
Ekologiia ministrligi balyq sharýashylyǵy komitetiniń akvaósirýdi damytý basqarmasynyń basshysy Miras Ǵabbasovtyń aitýynsha, qazirgi balyq sharýashylyǵyn damytý baǵdarlamasy elimizde balyq óndirý men tutynýdy arttyrýǵa tiis.
Aimaq basshysy Nurlan Noǵaev óńiraralyq tájiribe almasýda ár óńirdiń ereksheligin eskerý kerektigin atap ótti. Talqylaý barysynda sarapshylar búkil el boiynsha balyq sharýashylyǵyn damytýǵa múmkindik beretin ortaq sheshimge kele alýy kerek.
– Memleket basshysy Qasym-Jomart Toqaev 2022 jylǵy qarashada Mańǵystaý oblysynyń turǵyndarymen kezdesýinde óńirdegi balyq sharýashylyǵynyń áleýeti joǵary ekenin atap ótti. Ótken jyldyń sáýir aiynda Úkimet balyq sharýashylyǵyn damytý baǵdarlamasyn qabyldap, oblysta 2030 jylǵa deiin ósiriletin balyq kólemin 100 myń tonnaǵa arttyrý josparlanýda. Qajetti quzyretteri, bilimi, balyq aýlaý, ósirý jáne qaita óńdeý boiynsha tájiribesi bar sharýashylyq júrgizý sýbektilermen bailanys jáne tájiribe almasý balyq ónerkásibiniń damýyna oń áser etýi tiis. Kezdesýdiń nátijesi bolýy da kerek, – dedi Nurlan Noǵaev.
Otyrys nátijesinde jinalǵandar birqatar usynystardy ortaǵa saldy. Endi Mańǵystaýda balyq sharýashylyǵyn damytýdyń arnaiy baǵdarlamasy ázirlenbek.
Aita keteiik, búginde Mańǵystaýda 2030 jylǵa deiin balyq ósirý kólemin ulǵaitý úshin 218 milliard teńgeniń segiz jobasyn júzege asyrý josparlanǵan.
