Mańǵystaý oblysynda balasyna aliment tóleýden jaltarǵan 104 boryshker jaýapkershilikke tartyldy. Bul týraly óńirlik prokýratýra málimdedi, dep habarlaidy Dalanews.kz.
Qadaǵalaý organynyń málimetinshe, 2026 jyldyń alǵashqy toqsanynda aliment mindettemesin oryndamaǵan azamattarǵa qatysty birqatar shara qabyldanǵan. Nátijesinde 22 adam qylmystyq jaýapkershilikke, al 82 adam ákimshilik jaýapkershilikke tartylǵan.
Prokýrorlardyń aitýynsha, boryshkerler arasynda uzaq ýaqyt boiy balalaryna qarjylai qoldaý kórsetpei, resmi jumysqa ornalasýdan jaltarǵan jáne naqty tabysyn jasyryp kelgen azamattar bar.
Qabyldanǵan sharalardyń nátijesinde balalardyń paidasyna 53 million teńge óndirilip, bul qarajat tikelei olardyń esepshottaryna aýdarylǵan.
Osynyń arqasynda óńirdegi 366 kámeletke tolmaǵan balanyń quqyǵy qorǵalyp, tiesili qarajatyn alýyna múmkindik jasaldy.
Mańǵystaý oblysynyń prokýratýrasy aliment óndirý baǵytyndaǵy jumystar aldaǵy ýaqytta da jalǵasatynyn málimdedi.
