Mańǵystaý oblysynyń Bilim basqarmasy jariialaǵan iri memlekettik satyp alý daýly jaǵdaida toqtatylǵany belgili boldy, dep habarlaidy Dalanews.kz.
Goszakupturaly telegram arnasy taratqan málimetke sáikes, quny 1,3 mlrd teńge bolatyn IT-ónimdi qoldaý qyzmetine arnalǵan konkýrs barysynda áleýetti jetkizýshiler portaldaǵy ótinim berý batyrmasynyń bolmaýyna shaǵymdanǵan. Batyrma 4–9 aqpan aralyǵynda múlde kórinbegen, al ótinim qabyldaý merzimi bastapqyda 11 aqpanda aiaqtalýy tiis bolǵan.
Jetkizýshilerdiń biri shaǵym túsirgennen keiin qabyldaý merzimi 11–19 aqpan aralyǵyna uzartylǵan. Alaida 11 aqpan kúni tańǵy saǵat 10:00-de konkýrs qorytyndysynyń hattamasy jariialanyp, onda tapsyrys berýshiniń lottan óz bastamasymen bas tartqany kórsetilgen.
Zań boiynsha tapsyrys berýshi satyp alýdan bas tartýǵa quqyly jáne mundai sheshimniń sebepterin túsindirýge mindetti emes. Sondyqtan naqty qandai sebeppen konkýrs toqtatylǵany belgisiz kúiinde qaldy.
Shaǵymda jetkizýshiler tek tehnikalyq aqaýlardy ǵana emes, konkýrs qujattamasynyń sapasyn da synǵa alǵan. Olardyń aitýynsha, tehnikalyq sipattama men KTRÝ bir-birine sáikes kelmeidi, al qujattardan naqty qandai qyzmet qajet ekeni túsiniksiz bolǵan. Máselen, júieni nólden engizý kerek pe, álde tek qoldaý kórsetý me, bir júie me álde birnesheý me degen suraqtarǵa jaýap berilmegen.
Qazirgi ýaqytta bul satyp alý qaita jariialana ma, konkýrs qaita ótkizile me - belgisiz. Sarapshylar jaǵdaidy baqylaýda ustap otyrǵanyn aitty.
