Jái detal emes, asa mańyzdy, baýyrlastyqtyń boitumary, tutastyq temirqazyǵy bolýǵa laiyqty erekshe detal.
Tý! Túrki keńesiniń týy.
"Mundai deńgeidegi resmi rásimde Túrki keńesiniń týy alǵash ret premerdiń jelke tusynda Qazaqstannyń bairaǵymen qatar turdy. Júrek tolqytqan osy sát keibireýdiń nazarynan qalys qalǵanmen bizdiń jadymyzdan óshe qoiǵan joq.
Bul birinshi kezekte tutas túrki órkenietine (basqalarǵa da) berilgen belgi. Úndeý. Asa mańyzdy máni bar saiasi simvol" - deidi Türkiye gazeti.
Basylymnyń bulai deýi tegin emes. Ras, buǵan qatysty Úkimetbasy Máminniń qandai pikirde ekenin myna bizge beimálim. Qos týdyń qatar turýyn premerdiń ózi quptaǵan bolar, bálkim odan joǵary deńgeide pármen berilgen.
Qalai bolǵan kúnde bul jáitqa túrýli irgeden tas atyp otyrǵan teriskeidegi odaqtasymyz bei-jai qaramasy anyq.
Aldaǵy kúnderi Qazaqstandy aiyptaǵan, qaralaǵan propagandanyń jańa portsiiasyn tóbemizden tóge salýy ǵajap emes. Kreml ideologtary bul týdyń shyǵý tarihyn qazirden-aq qotara, qopara zertteýge kóshse tańǵalmaimyz.
Iá, túrik basylymnyń túneýkúngi rásimge airyqsha kóńil bólgeni, Qazaqstannyń resmi jalaýymen qatar turǵan Túrki keńesiniń týyna arnaiy toqtalǵany tegin emes. Ol úshin, qurmetti oqyrman, sizderdi bul týdyń shyǵý tarihymen tanys etýimiz kerek...
...
Týdyń tutastai alǵandaǵy qurylymy, bylaisha aitqanda dizainy túrki álemin bir judyryqqa jumylýǵa úndep tur.
Túrki keńesiniń bairaǵy Ázirbaijan jalaýyndaǵy juldyzdardan, Túrkiia jalaýyndaǵy jarty aidan, Qazaqstan men Qyrǵyzstannyń jalaýyndaǵy shartarapqa shapaǵyn shashqan kúnnen quralǵan. Týdyń túsi bizdiń kók bairaǵymyz sekildi aspan tústes.
Týdy eń alǵash ret osydan toǵyz jyl buryn Túrki keńesi qurylǵan shaqta Tuńǵysh prezident Nazarbaev pen sol tustaǵy Túrkiia basshysy Abdulla Gúl tuǵyrǵa qondyryp, jalaýyn jelbiretken.
Bizdiń eldiń Túrki keńesiniń bairaǵyna asa joǵary deńgeide qurmet kórsetýi kórsetýi neniń belgisi?
Baýyrlas eldiń basylymy osy oraida sarapshylarmen saýaldasyp, olardyń osy taraptaǵy oi-pikirin bilipti.
Ankaradaǵy Áleýmettik zertteýler ýniversitetiniń oqytýshysy, Túrkiiadaǵy áleýmettik-saiasi zertteýler qorynyń direktory Murat Eshiltashtyń aitýynsha bul baýyrlastyń bailanystardy bekite túsýge baǵyttalǵan batyl qadam.
"Uiym arqyly muqym túrki órkenietin odaqtastyrý, biriktirý muraty jatyr. Túrki keńesin halyqaralyq saiasi taqtaǵa shyǵaryp, Eýroodaq tektes uiymǵa ainaldyrý maqsatyn aiqyn ańǵaramyz.
Budan bólek bul túrkitektes elderdiń birigý protsesi bastalyp ketkenin, qan tartyp turatynyn, tamyrlastyq atty tabiǵi tartylysqa eshkim de tejeý qoia almasyn kórsetedi. Túrki dúniesi san-salaly baǵyttaǵy baýyrlastyq bailanysty tereńdete túsedi", – deidi ol.
Ulydaǵy ýniversitetiniń halyqaralyq qatynastar kafedrasynyń oqytýshysy, professor Ferhat Pirinchi osy rásimdegi premer Asqar Maminniń pozitsiiasyna airyqsha toqtalypty. Onyń oiynsha Túrki keńesiniń týyn Qazaqstan bairaǵymen qatar qoiýǵa pármen bergen premerdiń ózi.
"Máselen Eýroodaq osy uiymnyń qolastyna birikken elderdiń tóbesinen qaraityn organ. Sondyqtan odaqtyń jalaýy osy uiymǵa múshe memleketterdiń týymen qatar turýy hattamaǵa sai.
Al Túrki keńesiniń mundai quzireti joq. Ol halyqaralyq uiymǵa jatpaidy. Hattama qaǵidasy boiynsha premer-ministr Túrki keńesiniń tóraǵasyn uiymnyń týymen birge qabyldaýy mindetti emes.
Mámin muny bilmedi emes, bildi. Osy rásimge Túrki keńesiniń týyn alyp kirýge isharat etken premer-ministr osy arqyly uiymǵa syi-qurmet qursetti, ári aǵaiyndas elderge belgi beldi.
Qazaqstannyń Túrki keńesine airyqsha kóńil bóletinin, bolashaǵyn osy uiymmen tyǵyz bailanystyratynyn ańǵartty. Uiymǵa qazaq azamatynyń tóraǵalyq etetini de Máminniń tarapynan laiyqty baǵalanyp, kezdesýdiń mańyzyn arttyra tústi" - deidi sarapshy.
...
Jalpy bul kezdesý jaily biraz nárse aitýǵa bolady. Baǵdat Ámireev Úkimet basshysyna keńestiń jumysyna jasap júrgen ekpindi qoldaýy men qazaqstandyq memlekettik-atqarýshy mekemeleriniń uiymnyń kún tártibindegi máseleleriniń barlyǵyna derlik tiimdi sheshim tabýyna yqpal etip júrgenine alǵysyn jetkizdi.
Premer-Ministr Túrki Keńesiniń qyzmetine oń baǵasyn berip, Qazaqstannyń aldaǵy ýaqytta da birigip jumys isteýge, uiym sheńberindegi yntymyqtastyqqa tolyq qoldaý berýge daiyn ekenin bildirdi.
«Asqar Maminmen birge túrki álemindegi bolyp jatqan saiasi, ekonomikalyq jáne qoǵamdyq oqiǵalar tóńireginde jáne Túrki Keńesi aiasyndaǵy kópjaqty yntymaqtastyqtyń ózekti máseleleri týraly pikir almastyq. Sonymen qatar biz jaqynda Túrkistan qalasynda ótetin Túrki keńesi memleket basshylarynyń sammitine daiyndyq barysyn, bul joǵary deńgeidegi jiynnyń kún tártibi jáne de osy mańyzdy oqiǵaǵa bailanysty birqatar máseleler di talqylady», dedi Túrki keńesiniń basshysy (derekkóz: Egemen Qazaqstan, red.).
Túrik basylymdary osy kezdesýdiń odaqtasý baǵyttaǵy oń ózgeristerge sebepshi bolaryna senimdi.
"Túrki álemin tutastyrý, ulanǵaiyr aýmaǵy bar Turan memleketiniń qabyrǵasyn qalaý osy arqyly halyqaralyq saiasi sahnada oiyp turyp alyp, ata-baba amanatyn oryndaýymyz kerek. Osy maqsatqa jetpeiinshe maza joq.
Qazaqstan osy bir uly missiianyń uiytqysy ispettes. Qarashańyraqqa ie bolyp otyrǵan da - qazaqtar.
Túrki órkenieti Túrkistannan bastaý alady. Ataqonysta otyrǵan Qazaqstanǵa túbi bir túrki elderin tutastyrý missiiasy júktelgendei kórinedi", – deidi Türkiye gazeti.
Baýyrlas eldiń aqparat quraldary túneýkúngi kezdesý Túrki keńesiniń yqpalyn arttyryp, uiymnyń saiasi kúshke ainalaryna senimdi.
Bizdińshe Qazaqstannyń tarapynan jasalǵan saiasi qadam birinshi kezekte Túrkiiaǵa oi salýy kerek. Túrki keńesiniń qulashy keńeiip, birte-birte Túrki odaǵyna ainalýyna barlyq tarap múddeli bolýǵa tiisti.
Ázirlegen, Dýman BYQAI
Dalanews.kz anyqtamasy:
Türkiye gazeti. Túrkiianyń kúnbe-kún jaryq kóretin basylymy. 1970 jyldyń 22 sáýirinen «Hakikat» ataýymen tarala bastady. 1972 jyldyń 29 mamyrynan bastap ataýyn ózgertti (Türkiye, red).
Búginderi Türkiye eldegi ońshyl kózqarastaǵy aýditoriianyń sózin sóileitin, eń yqpaldy basylymnyń biri. Taralym jaǵynan rekord ornatqan da dál osy gazet. 1989 jyldyń jeltoqsanynda oqyrmandar gazettiń 1 424 350 danasyn satyp aldy.
Basylymnyń qazirgi taralymy 150 myńǵa jeteqabyl.
