Densaýlyq saqtaý ministri Aqmaral Álnazarova Mindetti áleýmettik meditsinalyq saqtandyrý (MÁMS) júiesine artyq tólengen jarnalardy qaitarýǵa azamattardyń quqyǵy bar ekendigin málimdedi. Bul týraly ol Májiliste ótken Úkimet saǵatynda aitty, dep habarlaidy Dalanews.kz El.kz aqparat agenttigine siltep.
Májilis depýtaty Erlan Sairov vedomstvo basshysynan eki nemese úsh jerde jumys isteitin adamdardyń MÁMS-ke jarna tóleý tártibi týraly suraǵan edi. Májilismen sol jarnany paidalanbaǵan adam aqshasyn qaitaryp alýy kerek dep otyr.
Eger azamat birneshe jerde jumys istese, jarna barlyq jumysynan tólenedi. Biraq ol bir jyl ishinde emhanaǵa múlde júginbese, aqshasy paidalanylmai qalady. Bul ádiletsiz. Árbir azamatqa óz jarnalaryn baqylaý, basqarý jáne qandai meditsinalyq qyzmetterdi paidalana alatynyn bilý quqy berilýi kerek. Bul qarajatty qajet bolǵan jaǵdaida óz aqshasy retinde paidalanýǵa múmkindik berilýi qajet, - dedi depýtat.
Ministr mundai múmkindik qarastyrylǵanyn rastady.
Eger birneshe jerde jumys isteitin azamattardyń jalpy jarnasy 850 myń teńgeden (10 eselengen eń tómengi jalaqy mólsheri) asyp ketse, olar artyq tólengen somany qaitaryp ala alady. Ol úshin MÁMS-tiń jergilikti filialyna ótinish berý jetkilikti, - dedi vedomstvo basshysy.
