Mamandyq tańdaý kez kelgen jas úshin mańyzdy másele ekenin áńgime basynda aittyq. Mamandyǵyn dál tańdap, ómirden adaspai jolyn tapqan jas el damýynyń kepili ekeni sózsiz. Sondyqtan qoǵam bolyp jastardyń mamandyq tańdaýyna kómek kórsetýdiń mańyzy zor.
Aýyldy aitpaǵan kúnde qalaly jerdegi keibir ata-analardyń ózi balalarynyń durys mamandyq tańdaýy úshin qajetti aqyl-keńes bere almaityny jasyryn emes. Osyny jaqsy túsingen «Ortalyq Aziiadaǵy bilim berý» ortalyǵynyń belsendileri bul baǵytta arnaiy joba daiyndap, jyl basynan beri Almaty qalasynda birqatar mektepterdegi 9-11 synyp oqýshylary arasynda jumys júrgizipti. Óz kezeginde elimizde tabysty jumys istep jatqan «Shevron» kompaniiasy máseleniń mańyzyn túsinip, jobaǵa qoldaý bildiripti.
Jiyn barysynda sóz alǵan «Ortalyq Aziiaaǵy bilim berý» ortalyǵynyń atqarýshy direktory Larisa Gorbýnova mektep bitirýshi túlekterdiń mamandyq tańdaýda óz betinshe tańdaý jasaýyna qoldaý kórsetýdiń qajettiligin alǵa tartty.
– Qoǵam damyp alǵa ozǵan saiyn, ómirimiz kúrdelenip, kún saiyn neshe túrli mamandyqtar paida bolyp jatyr. Olardyń bárin mektep bitirýshi túlekter bilmeidi. Biz 9-11 synyp oqýshylaryn áńgimege tartqanymyzda, olar Ulttyq biryńǵai test tórtinshi pándi tańdaǵan kezinde mamandyq tańdaý máselesimen betpe-bet keletinderin jasyrmai aitty. Óz basym tórtinshi pándi tańdaý durys mamandyq tańdaýǵa yqpal etedi dep eseptemeimin. Bir baiqaǵanymyz, 9 synyp oqshylary mamandyq tańdaýda jalpylama mamandyqtardyń atyn ataýdan árige asa almady. Al 11 synyp oqýshylarynyń birazy bolsa, meditsina mamandyǵyn, sonyń ishinde hirýrg, balalar dárigeri bolǵysy keletinderin aityp, mamandyq tańdaýda biraz oilanǵandaryn baiqatty. Budan keiin bizdiń ortalyqtyń qyzmetkerleri 9-11 synyp oqýshylarymen jumys istep, qoǵamdyq ómirimizde qandai mamandyqtarǵa suranys joǵary ekenin jiliktep túsindirgen soń, jastar ózderiniń qolaiyna keletin mamandyqtardy tańdaityndaryn aityp, alǵysyn bildirdi, – dedi L. Gorbýnova.
Jiyn barysynda sóz alǵan «Shevron» kompaniiasynyń áleýmettik baǵdarlamalar jáne áleýmettik investitsiia bóliminiń jetekshisi Leila Aitmuhanova:
– «Shevron» kompaniiasy áleýmettik baǵyttaǵy jobalarǵa barynsha qoldaý bildirip kele jatqanyn jurtshylyq jaqsy biledi. Mamandyq tańdaý – adam ómirinde mańyzdy sát bolǵandyqtan, bizder bul jobanyń iske asyrýdy qoldadyq. Qazirgi tańda jastardyń bir maman iesi bolyp qana qoimai, ózi tańdaǵan mamandyǵyn jan-tánimen súiýi de mańyzdy dep esepteimin. Mamandyǵyn shyn berilgen jandar kez kelgen salanyń aiaqqa turyp, damýyna septesetini anyq. «Shevron» kompaniiasy Almaty qalasy men Atyraý oblysynda jastardyń durys mamandyq tańdaýyna kómek kórsetip, bul baǵytta jumystarǵa belsene qatysyp keledi, – dep kompaniia ókili óz oiyn ortaǵa saldy.
Nurlan ÁÝBÁKIR
