Búgin Qazaqstan Respýblikasy Prezidentiniń keńesshisi Málik Otarbaev Abai ýniversitetiniń belsendi stýdentterimen kezdesti. Onyń basty maqsaty – Memleket basshysy Qasym-Jomart Toqaevtyń «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýynda kóterilgen máselelerdi túsindirý jáne ondaǵy aitylǵan aiqyn baǵdarlardy nasihattaý. Jyly júzdesý barysynda emen-jarqyn áńgime boldy, dep habarlaidy Dalanews.kz.
Prezident keńesshisi Joldaý boiynsha jyldyń aiaǵyna deiin Qazaqstan joǵary oqý oryndaryn túgel derlik aralyp shyqpaq. JOO stýdentterimen eń birinshi kezdesýdi elimizdegi tuńǵysh ýniversitetten bastaýynyń ózinde simvolikalyq mán bar. Óitkeni, ultymyzdyń uly tulǵalary bastaýynda turǵan Abai ýniversiteti 1928 jyly eń alǵashqy ashylǵan joǵary oqý oryny. Sonymen qatar, Ortalyq Aziia men Qazaqstandaǵy pedagogikalyq baǵyttaǵy kóshbasshy ýniversitet. Qasietti qara shańyraqtan túlep ushqan túlekter pedagog retinde erteńgi kúni memlekettiń irgetasyn nyǵaitýda mańyzdy ról atqarady.
«Men de stýdent bolǵanmyn. Al osyndai qundylyǵy joǵary Abai ýniversitetiniń stýdenti bolý – sizder úshin úlken mártebe»,- dedi Málik Nurjanuly.
Joldaýdyń jastar úshin asa kóp múmkindik beretin tetikteri týraly baiandaǵan M.Otarbaev Qasym-Jomart Kemelulynyń «Men aldymyzǵa óte mańyzdy strategiialyq maqsat qoidym. Qazaqstan úsh jyl ishinde mindetti túrde jappai tsifrlyq el bolýy kerek. Biz jappai tsifrlandyrý jáne jasandy intellekt tehnologiiasyn barynsha engizý arqyly ekonomikany jańǵyrtýymyz qajet» dep aitqan sóziniń astarynda jatqan úlken strategiialyq qadamdar jatqanyn aiqyndap berdi.
Qazir qoǵamdy jasandy intellekt (JI) máselelerine bailanysty talai-talai tolǵamdy oilar ári-sári kúige túsirip júrgeni belgili. Ony Prezident keńesshisi joqqa shyǵaryp, jasandy zerde tek qural bolýy kerek ekenin eske saldy. Bul óz kezeginde stýdentter tarapynan zor qyzyǵýshylyq týyndatty. Olar bolashaq pedagog retinde «JI-muǵalimmen qandai da bir básekelestik týyndaýy múmkin be?» degen ózekjardy suraqtaryn qoidy. Oǵan qatysty «Árine, zamanaýi pedagogtyń biligi joǵary bolǵany jón, biraq JI ustaz beretin adami ilimdi eshqashan bere almaidy» degen jaýap berildi.
Óz saýaldaryn erkin ári jan-jaqty qoiǵan stýdentter ózderin mazalaǵan kúrdelilikterge naqty-naqty mysaldarmen jaýap alyp, Prezident keńesshisi Málik Otarbaev pen Abai atyndaǵy QazUPÝ Basqarma tóraǵasy-rektor Bolat Tileptiń Joldaý týraly, búgingi kún tártibindegi jastardy qyzyqtyratyn tyń taqyryptardy kótergenderine rizashylyqtaryn bildirdi.
Bul pikir almasýdan túrli insait alǵan jastar taǵlymy men tálimi mol kezdesýden motivatsiia alyp shyqty.
