Malaiziia – otbasylyq týrizmniń otany
Jylda ótetin halyqaralyq kórme týristik sala maitalmandarynyń basyn qosyp, eń úzdik usynystar men sheshimderdi qabyldaýǵa múmkindik beredi. Biylǵy kórmege Malaiziianyń Qazaqstandaǵy ókiletti elshisi Dato Hidaiat Abdýl Hamid qatysyp, óz elinen arnaiy kelgen týrfirmalarǵa qoldaý kórsetti. Óz kezeginde elshi jýrnalistermen júzdesip, olardyń suraqtaryna jaýap berdi. Búginde Shyǵys Aziiada kóshbasshy elge ainalyp otyrǵan Malaiziiada ekonomikanyń túrli salalary joǵary deńgeide damyǵan. Malai halqynyń yrysyn arttyrǵan salanyń biri – týrizm desek, qatelespeimiz.
Qazaq jýrnalisterimen bolǵan emen-jarqyn áńgime barysynda elshi Dato Hidaiat Abdýl Hamid myrza týrizm – memlekettik túsimderdiń 20 paiyzyn quraitynyn aitty. Osy jaittan-aq Malaiziia úshin týrizm salasy qanshalyqty mańyzy zor ekenin baiqaýǵa bolady.
Qazirgi tańda Shyǵys Aziiada ornalasqan Tailand ta týrizm salasyn damytyp, tabysty salaǵa ainaldyryp otyrǵany belgili. Osy rette bizder Shyǵys Aziia elderi arasynda týrizm básekesi qalai júrip jatqanyn suradyq.
– Shyǵys Aziia aimaǵy týrizm salasyn damytýǵa qolaily aimaqtardyń biri ekeni ras. Sondyqtan aimaqtaǵy elder týrizm salasyn órkendetýge airyqsha mán beredi. Iá, Tailandta týrizm salasy jaqsy damyǵan. Biraq Malaiziianyń týrizmdi damytýda ózindik erekshelikteri bar ekenin umytpaǵan jón. Jalpy alǵanda, Malaiziiada otbasylyq týrizm joǵary deńgeide damyǵan. Sondyqtan otbasymen demalýdy kózdegen adamdar bizdiń elimizdi tańdaidy. Budan basqa sońǵy ýaqyttary bizdiń elde meditsinalyq týrizm joǵary deńgeide damyp keledi. Búginde Malaiziia meditsinalyq týrizmi damyǵan elderdiń birine ainalyp otyr. Malaiziia – Shyǵys Aziiadaǵy Islam dinin ustanatyn el. Sondyqtan halal týrizm salasy da keń kólemde qanat jaiyp keledi. Osy bir jaittardan-aq Malaiziiadaǵy týrizmniń qai baǵytta damyp jatqanyn ańǵarýǵa bolady, – dep elshi Dato Hidaiat Abdýl Hamid kókeide júrgen oiyn ortaǵa saldy. Qazaqstan men Malaiziianyń týrizm salasyndaǵy áriptestik qarym-qatynasy jaiynda:
– Týrizmdi damytýda Qazaqstannyń áleýeti zor. Qazaqstanda kóptegen tarihi-mádeni oryndar kóp. Bul nysandarǵa baratyn infraqurylymdy retteýdiń mańyzy zor. Budan basqa Qazaqstanda kórki kóz tartatyn ásem jerler de jetip artylady. Aldaǵy ýaqytta Qazaqstan Úkimeti infraqurylymdy damytyp, nasihat jumystaryn joǵary deńgeide uiymdastyrsa, Qazaqstanǵa dúniejúziniń ár túkpirinen týristerdi kóptep tartýǵa bolady, – dedi.
Jarbol KENTULY
