جىلدا وتەتىن حالىقارالىق كورمە تۋريستىك سالا مايتالماندارىنىڭ باسىن قوسىپ، ەڭ ۇزدىك ۇسىنىستار مەن شەشىمدەردى قابىلداۋعا مۇمكىندىك بەرەدى. بيىلعى كورمەگە مالايزيانىڭ قازاقستانداعى وكىلەتتى ەلشىسى داتو حيدايات ابدۋل حاميد قاتىسىپ، ءوز ەلىنەن ارنايى كەلگەن تۋرفيرمالارعا قولداۋ كورسەتتى. ءوز كەزەگىندە ەلشى جۋرناليستەرمەن جۇزدەسىپ، ولاردىڭ سۇراقتارىنا جاۋاپ بەردى. بۇگىندە شىعىس ازيادا كوشباسشى ەلگە اينالىپ وتىرعان مالايزيادا ەكونوميكانىڭ ءتۇرلى سالالارى جوعارى دەڭگەيدە دامىعان. مالاي حالقىنىڭ ىرىسىن ارتتىرعان سالانىڭ ءبىرى – تۋريزم دەسەك، قاتەلەسپەيمىز.
قازاق جۋرناليستەرىمەن بولعان ەمەن-جارقىن اڭگىمە بارىسىندا ەلشى داتو حيدايات ابدۋل حاميد مىرزا تۋريزم – مەملەكەتتىك تۇسىمدەردىڭ 20 پايىزىن قۇرايتىنىن ايتتى. وسى جايتتان-اق مالايزيا ءۇشىن تۋريزم سالاسى قانشالىقتى ماڭىزى زور ەكەنىن بايقاۋعا بولادى.
قازىرگى تاڭدا شىعىس ازيادا ورنالاسقان تايلاند تا تۋريزم سالاسىن دامىتىپ، تابىستى سالاعا اينالدىرىپ وتىرعانى بەلگىلى. وسى رەتتە بىزدەر شىعىس ازيا ەلدەرى اراسىندا تۋريزم باسەكەسى قالاي ءجۇرىپ جاتقانىن سۇرادىق.
– شىعىس ازيا ايماعى تۋريزم سالاسىن دامىتۋعا قولايلى ايماقتاردىڭ ءبىرى ەكەنى راس. سوندىقتان ايماقتاعى ەلدەر تۋريزم سالاسىن وركەندەتۋگە ايرىقشا ءمان بەرەدى. ءيا، تايلاندتا تۋريزم سالاسى جاقسى دامىعان. ءبىراق مالايزيانىڭ ءتۋريزمدى دامىتۋدا وزىندىك ەرەكشەلىكتەرى بار ەكەنىن ۇمىتپاعان ءجون. جالپى العاندا، مالايزيادا وتباسىلىق تۋريزم جوعارى دەڭگەيدە دامىعان. سوندىقتان وتباسىمەن دەمالۋدى كوزدەگەن ادامدار ءبىزدىڭ ەلىمىزدى تاڭدايدى. بۇدان باسقا سوڭعى ۋاقىتتارى ءبىزدىڭ ەلدە مەديسينالىق تۋريزم جوعارى دەڭگەيدە دامىپ كەلەدى. بۇگىندە مالايزيا مەديسينالىق ءتۋريزمى دامىعان ەلدەردىڭ بىرىنە اينالىپ وتىر. مالايزيا – شىعىس ازياداعى يسلام ءدىنىن ۇستاناتىن ەل. سوندىقتان حالال تۋريزم سالاسى دا كەڭ كولەمدە قانات جايىپ كەلەدى. وسى ءبىر جايتتاردان-اق مالايزياداعى ءتۋريزمنىڭ قاي باعىتتا دامىپ جاتقانىن اڭعارۋعا بولادى، – دەپ ەلشى داتو حيدايات ابدۋل حاميد كوكەيدە جۇرگەن ويىن ورتاعا سالدى. قازاقستان مەن مالايزيانىڭ تۋريزم سالاسىنداعى ارىپتەستىك قارىم-قاتىناسى جايىندا:
– ءتۋريزمدى دامىتۋدا قازاقستاننىڭ الەۋەتى زور. قازاقستاندا كوپتەگەن تاريحي-مادەني ورىندار كوپ. بۇل نىساندارعا باراتىن ينفراقۇرىلىمدى رەتتەۋدىڭ ماڭىزى زور. بۇدان باسقا قازاقستاندا كوركى كوز تارتاتىن اسەم جەرلەر دە جەتىپ ارتىلادى. الداعى ۋاقىتتا قازاقستان ۇكىمەتى ينفراقۇرىلىمدى دامىتىپ، ناسيحات جۇمىستارىن جوعارى دەڭگەيدە ۇيىمداستىرسا، قازاقستانعا دۇنيەجۇزىنىڭ ءار تۇكپىرىنەن تۋريستەردى كوپتەپ تارتۋعا بولادى، – دەدى.
جاربول كەنت ۇلى
