Qazaq kórermeni otandyq «Malai» komediiasyn eki apta qatarynan kinoteatrlardan úzbei tamashalaýda. Naýryz merekesi kúnderi bul film eldiń ár óńirindegi kinozaldarda anshlagpen kórsetildi, dep habarlaidy Dalanews.kz
Kartinanyń sátti shyǵýyna basty sebep – ulttyq bolmysty zamanaýi ári barshaǵa túsinikti taqyryppen sheber úilestire alǵany. Qazaqtyń áýeni, kiim úlgileri men salt-dástúrin kórermen jyly qabyldady, al týyndynyń januialyq formatta usynylýy ony túrli býyn ókilderine jaqyn ete tústi. Filmniń bas prodiýseri Beksultan Qazybektiń aitýynsha, kórermen tek qyzyǵýshylyq tanytyp qana qoimai, qyzyǵýshylyǵyn údete túsken.
«Biz úshin "Malai" – jai ǵana "Holop" filminiń qazaqsha nusqasy emes, óz aldyna jeke, kórermenge tanys ári jaqyn keiipkerlermen jasalǵan shynaiy oqiǵaǵa ainalýy mańyzdy boldy. Qarapaiym, kúlkili ázilder, akterlerdiń senimdi oiyny men áserli mýzyka – barlyǵy birigip, erekshe atmosfera týǵyzdy. Ásirese, búkil otbasymen kelip kórip jatqan kórermenderdi kórgende, maqsatymyz oryndalǵanyn sezemiz. Biz dál osyndai – jyly, shynaiy, barsha býynǵa túsinikti otbasylyq kino jasaǵymyz kelgen edi», – deidi prodiýser.
Oń pikir tek kórermenderdiń ǵana emes, kásibi synshylar tarapynan da aitylyp jatyr. Kinosynshylar «Malaidyń» kúlki syilaýymen qatar, qoǵamdaǵy ózekti máseleni de kóterip otyrǵanyn atap ótti. Mundai áserdi komediia men áleýmettik satiranyń úilesimi týǵyzǵan.
Filmniń stsenaristi Abdýsaid Shaihislamuly bylai dep túsindirdi:
«Stsenarii jazý barysynda biz komediianyń ishine qoǵamymyzdyń shynaiy bolmysyn engizýge tyrystyq. Bul film tek kóńil kóterý úshin emes, kórermen ózin tanityn, oiǵa qaldyratyn elementterimen de erekshelense dedik. Qazaq qoǵamyndaǵy kúndelikti ómirdiń ózi bizge bai material boldy. Sol shynaiylyq arqyly "Malai" óz kórermenderin taýyp otyr dep oilaimyn».
Jas akterler men tanymal blogerler oinaǵan basty rólderdi rejisser Ernar Nurǵaliev úilestirip shyqqan. Ol «Janym, ty ne poverish», «Kelinjan», «Jezdýha» syndy jobalarymen tanylǵan. Bul joly kórermen Jeńis Omarov (Zheka Fatbelly), Aida Qurmanǵalieva, Hamit Erdehanov, Ermek Shynbolatov pen Sabina Movlaevanyń oiynyn kóre alady. Sonymen qatar, tájiribeli akterler Dýlyǵa Aqmolda, Laýra Myrzahmetova men Jandarbek Sadyrbaev ta filmge qatysqan.
Filmniń tanymaldyǵy tek kassalyq tabyspen qana emes, túsirilim tobyna degen erekshe qyzyǵýshylyqpen de kórinedi. Promo-týr aiasynda túsirilim ujymy elimizdiń birneshe qalasyn aralap, Almaty, Astana, Shymkent, Taraz jáne Óskemende kórermendermen kezdesti. Ár qalada olardy jyly qarsy alǵan jurt áserlerimen bólisip, áserli sátterin talqylady. Túsirilim toby suraqtarǵa jaýap berip, estelik sýretterge túsip, qyzyqty jaittardy áńgimeledi.
Kórermen yqylasy, toly zaldar men joǵary kassalyq kórsetkishter «Malaidy» naýryzdyń eń tanymal otbasylyq filmine ainaldyrdy. Unico kompaniiasy men «Qazaqfilm» kinostýdiiasynyń birlesip jasaǵan bul týyndysy 13 naýryzdan bastap úlken ekrandarda kórsetilip jatyr. Kórip úlgerińiz!
MALAI
Filmdi usynǵandar: Unico, Qazaqfilm
Óndiris: JKS Entertainment
Seriktes stýdiialar: 1ON, Art Dealers
Bas prodiýserler: Anara Jýnýsova, Beksultan Qazybek, Vasilii Kýtsenko, Irina Sosnovaia, Temirlan Ataýlla
Prodiýserler: Aziz Vekimov, Oleg Dio, Timýr Shevchenko
Qoiýshy-rejisser: Ernar Nurǵaliev
Qoiýshy-operator: Erkebulan Qýanyshbaev
Basty rólderde: Jeńis Omarov, Aida Qurmanǵalieva, Jandarbek Sadyrbaev, Laýra Myrzahmetova, Dýlyǵa Aqmolda, Hamit Erdehanov, Meiramhan Shalqybekov, Ermek Shynbolatov, Sabina Movlaeva
Stsenarii avtorlary: Abdýsaid Shaihislamýly, Daniiar Bekjanov, Aibek Jolmyrza
Qoiýshy-sýretshiler: Aibek Ainabekov, Rýslan Ospanov
Tusaýkeser: 13 naýryz 2025
