Parlament Májilisinde depýtat Nikolai Arsiýtin volonterlik qyzmetti damytý máseleleri boiynsha depýtattyq saýaldy jariialady. Saýal Premer-ministrdiń orynbasary – Mádeniet jáne aqparat ministri Aida Balaevaǵa joldandy, dep habarlaidy Dalanews.kz.
Depýtat óz sózinde 2026 jylǵy 30 qańtarda Memleket basshysynyń qatysýymen ótken Volonterler forýmynda kóterilgen bastamalarǵa toqtaldy. Atap aitqanda, «Aýyl jastary» qozǵalysynyń ókilderi volonterlerdiń ómirin saqtandyrý jáne olardyń qyzmetin eńbek ótiline esepteý máselesin kótergen.
N. Arsiýtinniń aitýynsha, sońǵy jyldary Qazaqstanda volonterlik qozǵalys aitarlyqtai damyǵan. Eger 2020 jyly elde shamamen 50 myń volonter bolsa, búginde olardyń sany 300 myńǵa jetken. Qazirgi tańda 800-den astam uiym áleýmettik jobalardy júzege asyryp, respýblikalyq jáne 20 óńirlik front-ofis jumys isteidi.
Sonymen qatar depýtat qoldanystaǵy zańnamada volonterlik qyzmet tek áleýmettik belsendilik retinde qarastyrylatynyn atap ótti. Iaǵni ol eńbek ótiline engizilmeidi jáne tolyqqandy áleýmettik kepildiktermen qamtamasyz etilmegen. Budan bólek, volonterlerdi mindetti saqtandyrý normalary da qarastyrylmaǵan.
Osyǵan bailanysty depýtat volonterlik qyzmetti eńbek ótiline esepteýdiń pilottyq jobasyn iske qosýdy usyndy. Bul bastama, eń aldymen, áleýmettik volonterlikpen turaqty ainalysatyn azamattarǵa – qarttarǵa, múmkindigi shekteýli jandarǵa jáne ózge de osal toptarǵa kómektesetin adamdarǵa baǵyttalýy múmkin.
Sondai-aq jańa 2030 jylǵa deiingi volonterlikti damytý baǵdarlamasy aiasynda eriktilerge qosymsha áleýmettik qoldaý sharalaryn, onyń ishinde ómiri men densaýlyǵyn saqtandyrý máselesin qarastyrý usynyldy.
Depýtat Úkimetten atalǵan usynystar boiynsha zańnamada belgilengen tártippen jazbasha jaýap berýdi surady.
