پارلامەنت ماجىلىسىندە دەپۋتات نيكولاي ارسيۋتين ۆولونتەرلىك قىزمەتتى دامىتۋ ماسەلەلەرى بويىنشا دەپۋتاتتىق ساۋالدى جاريالادى. ساۋال پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆاعا جولداندى، دەپ حابارلايدى Dalanews.kz.
دەپۋتات ءوز سوزىندە 2026 جىلعى 30 قاڭتاردا مەملەكەت باسشىسىنىڭ قاتىسۋىمەن وتكەن ۆولونتەرلەر فورۋمىندا كوتەرىلگەن باستامالارعا توقتالدى. اتاپ ايتقاندا، «اۋىل جاستارى» قوزعالىسىنىڭ وكىلدەرى ۆولونتەرلەردىڭ ءومىرىن ساقتاندىرۋ جانە ولاردىڭ قىزمەتىن ەڭبەك وتىلىنە ەسەپتەۋ ماسەلەسىن كوتەرگەن.
ن. ءارسيۋتيننىڭ ايتۋىنشا، سوڭعى جىلدارى قازاقستاندا ۆولونتەرلىك قوزعالىس ايتارلىقتاي دامىعان. ەگەر 2020 جىلى ەلدە شامامەن 50 مىڭ ۆولونتەر بولسا، بۇگىندە ولاردىڭ سانى 300 مىڭعا جەتكەن. قازىرگى تاڭدا 800-دەن استام ۇيىم الەۋمەتتىك جوبالاردى جۇزەگە اسىرىپ، رەسپۋبليكالىق جانە 20 وڭىرلىك فرونت-وفيس جۇمىس ىستەيدى.
سونىمەن قاتار دەپۋتات قولدانىستاعى زاڭنامادا ۆولونتەرلىك قىزمەت تەك الەۋمەتتىك بەلسەندىلىك رەتىندە قاراستىرىلاتىنىن اتاپ ءوتتى. ياعني ول ەڭبەك وتىلىنە ەنگىزىلمەيدى جانە تولىققاندى الەۋمەتتىك كەپىلدىكتەرمەن قامتاماسىز ەتىلمەگەن. بۇدان بولەك، ۆولونتەرلەردى مىندەتتى ساقتاندىرۋ نورمالارى دا قاراستىرىلماعان.
وسىعان بايلانىستى دەپۋتات ۆولونتەرلىك قىزمەتتى ەڭبەك وتىلىنە ەسەپتەۋدىڭ پيلوتتىق جوباسىن ىسكە قوسۋدى ۇسىندى. بۇل باستاما، ەڭ الدىمەن، الەۋمەتتىك ۆولونتەرلىكپەن تۇراقتى اينالىساتىن ازاماتتارعا – قارتتارعا، مۇمكىندىگى شەكتەۋلى جاندارعا جانە وزگە دە وسال توپتارعا كومەكتەسەتىن ادامدارعا باعىتتالۋى مۇمكىن.
سونداي-اق جاڭا 2030 جىلعا دەيىنگى ۆولونتەرلىكتى دامىتۋ باعدارلاماسى اياسىندا ەرىكتىلەرگە قوسىمشا الەۋمەتتىك قولداۋ شارالارىن، ونىڭ ىشىندە ءومىرى مەن دەنساۋلىعىن ساقتاندىرۋ ماسەلەسىن قاراستىرۋ ۇسىنىلدى.
دەپۋتات ۇكىمەتتەن اتالعان ۇسىنىستار بويىنشا زاڭنامادا بەلگىلەنگەن تارتىپپەن جازباشا جاۋاپ بەرۋدى سۇرادى.
