Májilistiń jalpy otyrysynda depýtat Magerram Magerramov Qazaqstanda kiberqylmys pen jeke málimetterdiń urlanýy jyldan jylǵa artyp kele jatqanyn, odan zardap shegýshiler qatary da ósip jatqanyn, alaida quzyrly organdar bul rette qaýqarsyz ekenin aityp, onlain nesielerge tyiym salýdy usyndy, dep jazady Dalanews.kz.
Halyq qalaýlysynyń aitýynsha, jeke málimetterdiń qaidan taralyp jatqany áli kúnge deiin anyqtalmaǵandyqtan, qylmyskerler jaýapkershilikten jaltaryp, al qarapaiym halyq almaǵan nesieni tólep, iyǵyna aýyr júk artýda.
Óz sózin rastaý úshin depýtat statistikany da sóiletti:
- nesiemen bailanysty alaiaqtyq boiynsha 85 qylmystyq istiń 47-sinde sotqa deiingi tergeý sharalary toqtatyldy, al 45 jaǵdaida quqyq buzýshyny anyqtaý múmkin bolmady.
- tólem kartalaryn paidalaný arqyly alaiaqtyqqa qatysty 813 qylmystyq is boiynsha 223 tergeý sharalary toqtatyldy, óitkeni kúdiktilerdi tabý múmkin bolmaǵan.
- 218 jaǵdaida qylmyskerler Qazaqstannan tys jerlerde bolǵan.
Magerramov mundai qylmystardyń ashylý kórsetkishi óte tómen deńgeide qalyp otyrǵanyn basa atap ótti.
"Almaǵan nesiesin bizdiń azamattar nege tóleýi kerek",degen depýtat alaiaqtyqtyń osy túriniń odan ári órkendeýine jol bermeý úshin elektrondy nesieleýge tyiym salýdy jáne bankter men memlekettik organdar tarapynan baqylaýdy kúsheitýdi usyndy.
Magerramov onlain nesie berý qyzmetterin toqtatý arqyly ǵana alaiaqtyq áreketterdiń aldyn alyp, jábirlenýshiler sanyn azaitýǵa bolady dep esepteidi. Bul usynys qazaqstandyqtardyń aldap-arbaýǵa túspeýi úshin qorǵanys turǵysynda jasalǵan qadam bola alady.
