Májiliste jańa Salyq kodeksiniń jobasy talqylanyp, onyń qoldanystaǵy zańnamadan basty aiyrmashylyqtary men negizgi maqsattary qarastyryldy. Otyrysqa májilis jáne máslihat depýtattary, kásipkerler men sarapshylar qatysty, dep habarlaidy Dalanews.kz.
Májilis depýtaty Aidos Sarymnyń aitýynsha, jańa Salyq kodeksi kelesi mindetterdi qamtýy tiis:
"Eń birinshi, turaqtylyq. Qazirgi zańnamaǵa únemi engiziletin ózgerister bizneske qiyndyq týdyrady. Sondyqtan kodeks turaqty bolýy tiis, bul kásipkerlerge senimdi jumys isteýge múmkindik beredi. Ekinshi, salyq bazasyn keńeitý. Eldegi 2 millionǵa jýyq shaǵyn jáne orta biznes sýbektisin ashyq jumys isteýge yntalandyrý mańyzdy. “Salyq tóleý ony tólemegennen arzan bolýy kerek,” – dedi Aidos Sarym.
Jańa zań jobasy boiynsha jumys tobynyń jetekshisi, Májilis depýtaty Berik Beisenǵalievtiń málimetinshe, qujatty ázirleý barysynda 12 otyrys ótkizilgen. Joba 17 qyrkúiekte Májiliste tanystyryldy.
“Bul qujattyń basty aiyrmashylyǵy – salyqtyq ákimshilendirý máselesine basa nazar aýdarylýynda. Májiliste qurylǵan jumys tobyna depýtattar, memlekettik organdar ókilderi, “Atameken” UKP, qoǵamdyq birlestik ókilderi men sarapshylar qatysýda. Ár otyrysqa orta eseppen 230 adam qatysady",- dedi Berik Beisenǵaliev.
Jańa kodeks kásipkerlerdiń salyqtyq mindettemelerin ońtailandyrýǵa jáne zańnamanyń turaqtylyǵyn qamtamasyz etýge baǵyttalǵan.
