Muhtar Áýezov atyndaǵy Qazaq memlekettik akademiialyq drama teatrynyń ártisterinen maza qashqan. Aitýlarynsha, «óner ordasynyń basshysy Sábit Ábdihalyqov aýysady» degen sybys shyqqaly eshkimniń jumys isteýge qulqy joq.
– Sábitti aýystyrýǵa qandai sebep bar? Sony bizge aityńyzdarshy? Aýystyrady dep estip jatyrmyz. Ol kisi birdeńe jedi me? Ol kisi zeinetke shyǵa ma? Joq! Qandai sebep? Bizge nege aitpaidy? – deidi aktrisa Rashida Hadjieva.
Sońǵy bes jylda ákemteatrda úsh márte basshy aýysypty. Sondyqtan kópshilik quzyrly vedomostvanyń qazirgi direktordy qyzmetinen alý týraly ideiasyn qoldamaidy.
– Taǵy bir bastyq kelip, taǵy talan-tarajǵa salsa, ne bolamyz? Biz teatrda ár bastyqtyń jaǵdaiyn oilap, árkimniń kóńiline qarap júrgende, óner qaida qalady? Sábit – keremet menedjer. Kórermen men aqshamyzdy qaitardy, – deidi aktrisa Nurjan Beksultanova.
Ujymdaǵylar Sábit Ábdihalyqovtyń jumysyna razy. Bir jylda jańa qoiylymdar men kórermen kóbeigen. Sáikesinshe, kassadaǵy tabys molaiypty. Eń bastysy, teatrdyń talai jylǵy qordalanǵan 10 mln teńgeden astam qaryzy tolyq ótelgen.
Qazir teatrdyń basshysy júregine ota jasatyp, shetelde em alyp jatyr eken. Al onyń orynbasaryna vitse-ministr qysym jasaǵanyn aitady.
– Ministrdiń atynan Dáýeshov myrzanyń ózi maǵan «aryz jazyp, óz erkińmen ketińder» dep jazyp jatyr, – deidi M. Áýezov atyndaǵy qazaq memlekettik akademiialyq drama teatry direktorynyń orynbasary Álibek Ámirseiitov.
– Bizde «astyrtyn oiyndar» júikemizge tidi. Jańadan kelip jatqan jastardyń turatyn orny joq. Ash-jalańash júredi, tańnan keledi, bii bar, vokaly bar. 12 saǵat jumys isteidi, – dedi QR Halyq ártisi Gúlnár Jaqypova
Jańa jyldan bastap ártisterge túrli sahna kiimin tigip, sahnany bezendiretin qyzmetkerlerdiń jalaqysy qysqarǵan. Osylaisha sahna maitalmandary ministr basshy taǵaiyndaýdan góri, jastarǵa jaǵdai jasap, jalaqyny kóbeitse dep tilegin aitýda.
Al ministrliktiń bergen jaýaby múlde basqa.
– Tetar direktoryn jumystan bosatý bizdiń oiymyzda joq. Biraq jumystyń tiimdiligine qarai, onyń iskerligine qarai, ary qarai «bul jumysty alyp kete ala ma, alyp kete almai ma?» degen másele týyndaýy múmkin. Sonymen qatar ujymnyń pikiri bizge mańyzdy, – deidi QR Mádeniet jáne sport ministrligine qarasty Mádeniet jáne óner isteri departamentiniń direktory Kúmis Seiitova.
Óner ujymy teatr direktorynyń aýysýyna qatysty áńgimeni aldaǵy bolatyn kúrdeli jóndeýmen bailanystyryp otyr. Jańa maýsym aiaqtalsa, ákem teatr 2-3 jylǵa kúrdeli jóndeýge jabylady eken. «Bul degenimiz qyrýar aqsha» deidi áritster. Sondyqtan óner ujymy Mádeniet jáne sport ministri Aqtoty Raiymqulovamen júzbe-júz kezdesýdi talap etýde.
Ásem QABYLBEK
