مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ارتىستەرىنەن مازا قاشقان. ايتۋلارىنشا، «ونەر ورداسىنىڭ باسشىسى ءسابيت ءابدىحالىقوۆ اۋىسادى» دەگەن سىبىس شىققالى ەشكىمنىڭ جۇمىس ىستەۋگە قۇلقى جوق.
– ءسابيتتى اۋىستىرۋعا قانداي سەبەپ بار؟ سونى بىزگە ايتىڭىزدارشى؟ اۋىستىرادى دەپ ەستىپ جاتىرمىز. ول كىسى بىردەڭە جەدى مە؟ ول كىسى زەينەتكە شىعا ما؟ جوق! قانداي سەبەپ؟ بىزگە نەگە ايتپايدى؟ – دەيدى اكتريسا راشيدا حادجييەۆا.
سوڭعى بەس جىلدا اكەمتەاتردا ءۇش مارتە باسشى اۋىسىپتى. سوندىقتان كوپشىلىك قۇزىرلى ۆەدوموستۆانىڭ قازىرگى ديرەكتوردى قىزمەتىنەن الۋ تۋرالى يدەياسىن قولدامايدى.
– تاعى ءبىر باستىق كەلىپ، تاعى تالان-تاراجعا سالسا، نە بولامىز؟ ءبىز تەاتردا ءار باستىقتىڭ جاعدايىن ويلاپ، اركىمنىڭ كوڭىلىنە قاراپ جۇرگەندە، ونەر قايدا قالادى؟ ءسابيت – كەرەمەت مەنەدجەر. كورەرمەن مەن اقشامىزدى قايتاردى، – دەيدى اكتريسا نۇرجان بەكسۇلتانوۆا.
ۇجىمداعىلار ءسابيت ءابدىحالىقوۆتىڭ جۇمىسىنا رازى. ءبىر جىلدا جاڭا قويىلىمدار مەن كورەرمەن كوبەيگەن. سايكەسىنشە، كاسساداعى تابىس مولايىپتى. ەڭ باستىسى، تەاتردىڭ تالاي جىلعى قوردالانعان 10 ملن تەڭگەدەن استام قارىزى تولىق وتەلگەن.
ءقازىر تەاتردىڭ باسشىسى جۇرەگىنە وتا جاساتىپ، شەتەلدە ەم الىپ جاتىر ەكەن. ال ونىڭ ورىنباسارىنا ۆيسە-مينيستر قىسىم جاساعانىن ايتادى.
– ءمينيستردىڭ اتىنان داۋەشوۆ مىرزانىڭ ءوزى ماعان «ارىز جازىپ، ءوز ەركىڭمەن كەتىڭدەر» دەپ جازىپ جاتىر، – دەيدى م. اۋەزوۆ اتىنداعى قازاق مەملەكەتتىك اكادەميالىق دراما تەاترى ديرەكتورىنىڭ ورىنباسارى الىبەك امىرسەيىتوۆ.
– بىزدە «استىرتىن ويىندار» جۇيكەمىزگە ءتيدى. جاڭادان كەلىپ جاتقان جاستاردىڭ تۇراتىن ورنى جوق. اش-جالاڭاش جۇرەدى، تاڭنان كەلەدى، ءبيى بار، ۆوكالى بار. 12 ساعات جۇمىس ىستەيدى، – دەدى ق ر حالىق ءارتىسى گۇلنار جاقىپوۆا
جاڭا جىلدان باستاپ ارتىستەرگە ءتۇرلى ساحنا كيىمىن تىگىپ، ساحنانى بەزەندىرەتىن قىزمەتكەرلەردىڭ جالاقىسى قىسقارعان. وسىلايشا ساحنا مايتالماندارى مينيستر باسشى تاعايىنداۋدان گورى، جاستارعا جاعداي جاساپ، جالاقىنى كوبەيتسە دەپ تىلەگىن ايتۋدا.
ال مينيسترلىكتىڭ بەرگەن جاۋابى مۇلدە باسقا.
– تەتار ديرەكتورىن جۇمىستان بوساتۋ ءبىزدىڭ ويىمىزدا جوق. ءبىراق جۇمىستىڭ تيىمدىلىگىنە قاراي، ونىڭ ىسكەرلىگىنە قاراي، ارى قاراي «بۇل جۇمىستى الىپ كەتە الا ما، الىپ كەتە الماي ما؟» دەگەن ماسەلە تۋىنداۋى مۇمكىن. سونىمەن قاتار ۇجىمنىڭ پىكىرى بىزگە ماڭىزدى، – دەيدى ق ر مادەنيەت جانە سپورت مينيسترلىگىنە قاراستى مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا.
ونەر ۇجىمى تەاتر ديرەكتورىنىڭ اۋىسۋىنا قاتىستى اڭگىمەنى الداعى بولاتىن كۇردەلى جوندەۋمەن بايلانىستىرىپ وتىر. جاڭا ماۋسىم اياقتالسا، اكەم تەاتر 2-3 جىلعا كۇردەلى جوندەۋگە جابىلادى ەكەن. «بۇل دەگەنىمىز قىرۋار اقشا» دەيدى ارىتستەر. سوندىقتان ونەر ۇجىمى مادەنيەت جانە سپورت ءمينيسترى اقتوتى رايىمقۇلوۆامەن جۇزبە-جۇز كەزدەسۋدى تالاپ ەتۋدە.
اسەم قابىلبەك
