Aqtoty Raiymqulova 2016 jyldyń qazan aiynan bastap mádeniet jáne sport vitse-ministri qyzmetin atqarǵan.
Búgin májiliste áleýmettik-mádeni damý komitetiniń otyrysy ótip, onda Aqtoty Raiymqulovanyń kandidatýrasy qaralǵan bolatyn.
Komitet músheleri Raiymqulovaǵa birqatar suraq qoidy. Áleýmettik-mádeni damý komiteti otyrysynyń qorytyndysy boiynsha "Qazaqstan Respýblikasynyń parlamenti jáne onyń depýtattarynyń mártebesi týraly" konstitýtsiialyq zańnyń 22-1-babyna sáikes, premer-ministrdiń usynysymen Aqtoty Raiymqulovanyń kandidatýrasy mádeniet jáne sport ministri laýazymyna taǵaiyndaý úshin usynyldy. Otyrys sońynda depýtattar kandidatqa aldaǵy jumysyna tabys tiledi.
Aita ketsek, Arystanbek Muhamediuly vedomstvony bes jyldai basqardy. Ol mádeniet jáne sport ministri bolyp 2014 jyldyń 6 tamyzynda taǵaiyndalǵan bolatyn.
Aqtoty Raiymqulova týraly ne bilemiz?
Aqtoty Raiymqulova 1964 jyly Almaty qalasynda dúniege kelgen. 1987 jyly Qurmanǵazy atyndaǵy Almaty memlekettik konservatoriiasyn "Kompozitsiia jáne fortepiano" mamandyǵy boiynsha támamdaǵan. 2007 jyly Halyqaralyq biznes akademiiasyn MVA dárejesimen bitiredi.
Raiymqulova ár jyldary Qurmanǵazy atyndaǵy Almaty memlekettik konservatoriiasynyń kontsertmeisteri, tárbie jáne kontsert jumysy jónindegi prorektory bolyp eńbek etti. Qazaq qyzdar pedagogikalyq institýtynda oqytýshy bolǵan.
2013 jyly QR Mádeniet ministrliginiń mádeniet jáne óner isi komitetiniń tóraǵasy bolyp taǵaiyndalady. Bir jyldan keiin Mádeniet jáne sport ministrliginiń mádeniet jáne óner isteri departamentiniń direktory bolady. 2016 jyly qazanda Raiymqulova mádeniet jáne sport vitse-ministri qyzmetine keledi.
Aqtoty Raiymqulova simfoniialyq poemalar, spektakl men kinofilmder mýzykasynyń, kóptegen ánniń avtory.
