Prezident Qasym-Jomart Toqaevtyń Frantsiiaǵa memlekettik sapary qarsańynda QR Mádeniet jáne aqparat ministri Aida Balaeva Lývr mýzeiiniń prezident-direktory Lorans de Karmen kezdesý ótkizdi. Kezdesý mádeni almasý máseleleri jáne Qazaqstan men Frantsiia arasyndaǵy perspektivaly jobalarǵa arnaldy, – dep habarlaidy Dalanews.kz QR Mádeniet jáne aqparat ministrliginiń baspasóz qyzmetine silteme jasap.
Taraptar Qazaqstan mýzeileri men Lývr arasynda birlesken seminarlar men konferentsiialar ótkizý arqyly tájiribe almasý múmkindigin talqylady. Yntymaqtastyq kórme qyzmetimen qatar, ǵylymi-zertteý, arheologiialyq zertteýler, ǵylymi materialdar jariialaý jáne mýzei isindegi tájiribe almasý baǵyttaryn da qamtýy múmkin.
– Bizdi Qazaqstannyń mádeni murasyn zertteý boiynsha birlesken ǵylymi jumysqa qatysty yntymaqtastyq qyzyqtyrady. QR Ulttyq mýzeiiniń janynan restavratsiia ortalyǵyn ashýdy josparlap otyrmyz. Sondyqtan Lývr mýzeiiniń ǵylymi, kadrlardy daiarlaý, kórmeler uiymdastyrý boiynsha qoldaýyn alǵymyz keledi, – dep atap ótti Aida Balaeva.
– Biz yntymaqtastyqqa, sonyń ishinde kórmelerdi birlesip uiymdastyrýǵa da daiynbyz, sebebi bul Lývr mýzeiiniń halyqaralyq saiasatyna sai keledi, – dedi kezdesýde Lorans de Kar.
Kezdesý sońynda eki tarap ta birlesken jobalar men mádeni almasý Qazaqstan men Frantsiia arasyndaǵy ekijaqty qarym-qatynasty nyǵaityp, halyqtar arasyndaǵy ózara túsinistikti tereńdetetinine senim bildirdi.
