Qazaqstanda saiǵaqtardyń sanyn “retteý” naýqany resmi túrde bastaldy. Bul shara aiasynda 800 myńǵa jýyq dala kiigin joiý kózdelip otyr, dep habarlaidy Dalanews.kz.
Ekologiia ministrligi ańshylardyń atyp óltirgen saiǵaqtarynyń etin ózderi alyp ketýine ruqsat bergenin málimdedi. Vedomstvo tipti saiǵaq etin óńdeitin et kombinattaryn salý protsesin bastap ketkenin, aldaǵy kúnderi bul ettiń baǵasy da jariialanatynyn habarlady.
Resmi málimetke súiensek, qazirgi tańda Qazaqstandaǵy saiǵaq sany 3,9 millionǵa jetken. Bul – 1974 jylǵy tarihi kórsetkishten úsh ese kóp. Aýyl sharýashylyǵyna kelip jatqan zalaldy alǵa tartqan bilik, ásirese Batys Qazaqstan oblysyndaǵy fermerlerdiń shaǵymynan keiin osyndai sheshim qabyldaǵan. Óńirde 2,3 millionǵa jýyq saiǵaq mekendeidi. Osy aimaqta 460 myńǵa deiin kiik atý josparlanǵan.
Aýyl sharýashylyǵy ministri Aidarbek Saparov saiǵaq etin óńdeýmen ainalysatyn 18 kásiporyn tirkelgenin, olarda veterinarlyq baqylaý qarastyrylǵanyn aitty. Kiik etiniń baǵasy 10 kún ishinde belgili bolady. Keiin ónimdi ótkizý joldary anyqtalady.
Resmi ańshylyq maýsymy 3 shildede bastalyp, 30 qarashaǵa deiin jalǵasady. Alaida atylatyn kiiktiń jynysy men jasyna qarai merzimi ózgeshe: erkekteri — 1 shildeden 30 qarashaǵa deiin, analyqtary men biyl týǵan tólderi — 1 qyrkúiekten 30 qarashaǵa deiin.
Eske salaiyq, buǵan deiin Qazaqstanda 800 myńǵa jýyq aqbóken aýlanýy múmkin ekeni habarlanǵan edi. Bul týraly Ekologiia jáne tabiǵi resýrstar ministri Erlan Nysanbaev málimdedi.
“Ǵylymi negizdemege sáikes, búgingi tańda búkil popýliatsiianyń 20 paiyzyn tabiǵi ortadan alý usynylyp otyr. Kóktemgi esep qorytyndysy boiynsha, Qazaqstandaǵy aqbóken sany resmi túrde 3,9 millionǵa jetti. Onyń ishinde 2,3 milliony – Oral popýliatsiiasyna, 1,6 milliony – Betpaqdala popýliatsiiasyna, al 78 myńy – Ústirt popýliatsiiasyna tiesili. Jalpy alǵanda, biz 4 millionǵa jýyq, naqtyraq aitsaq, 3 mln 978 myń dep esepteimiz. Osyǵan sáikes 800 myń aqbókendi atý kózdelip otyr”, — dedi ministr.
Ministrdiń aitýynsha, janýarlardyń jynysy men jasy da naqty belgilengen.
“40% – atalyqtar, 40% – analyqtar, 20% – biyl týǵan tóli. Iaǵni, qazirgi tańda bizde barlyq esep, parametrler naqtylanǵan. Ótken aptada ǵylymi negizdemeni resmi túrde aldyq. Búgin uiymdastyrýshylyq máselelerdi talqyladyq. Bir-eki kún ishinde sheshimimizdi resmi túrde jariialaimyz”, — dedi Erlan Nysanbaev.
Sondai-aq ministr aqbóken etin óńdeýge arnalǵan jeke et kombinaty salynýy múmkin ekenin aitty.
“Munshama kólemde janýar alynsa, etin óńdeý máselesi óte mańyzdy bolmaq. Sondyqtan búgingi tańda biz jergilikti qurylymdarmen birlesip, aqbóken etin qaita óńdeitin et kombinattaryn salý boiynsha investitsiialyq jobalardy pysyqtap jatyrmyz. Qazirgi tańda bul bastamaǵa altyǵa jýyq kompaniia qyzyǵýshylyq bildirdi”, — dedi ol.
