قازاقستاندا سايعاقتاردىڭ سانىن “رەتتەۋ” ناۋقانى رەسمي تۇردە باستالدى. بۇل شارا اياسىندا 800 مىڭعا جۋىق دالا كيىگىن جويۋ كوزدەلىپ وتىر، دەپ حابارلايدى Dalanews.kz.
ەكولوگيا مينيسترلىگى اڭشىلاردىڭ اتىپ ولتىرگەن سايعاقتارىنىڭ ەتىن وزدەرى الىپ كەتۋىنە رۇقسات بەرگەنىن مالىمدەدى. ۆەدومستۆو ءتىپتى سايعاق ەتىن وڭدەيتىن ەت كومبيناتتارىن سالۋ پروسەسىن باستاپ كەتكەنىن، الداعى كۇندەرى بۇل ەتتىڭ باعاسى دا جاريالاناتىنىن حابارلادى.
رەسمي مالىمەتكە سۇيەنسەك، قازىرگى تاڭدا قازاقستانداعى سايعاق سانى 3،9 ميلليونعا جەتكەن. بۇل – 1974 جىلعى تاريحي كورسەتكىشتەن ءۇش ەسە كوپ. اۋىل شارۋاشىلىعىنا كەلىپ جاتقان زالالدى العا تارتقان بيلىك، اسىرەسە باتىس قازاقستان وبلىسىنداعى فەرمەرلەردىڭ شاعىمىنان كەيىن وسىنداي شەشىم قابىلداعان. وڭىردە 2،3 ميلليونعا جۋىق سايعاق مەكەندەيدى. وسى ايماقتا 460 مىڭعا دەيىن كيىك اتۋ جوسپارلانعان.
اۋىل شارۋاشىلىعى ءمينيسترى ايداربەك ساپاروۆ سايعاق ەتىن وڭدەۋمەن اينالىساتىن 18 كاسىپورىن تىركەلگەنىن، ولاردا ۆەتەرينارلىق باقىلاۋ قاراستىرىلعانىن ايتتى. كيىك ەتىنىڭ باعاسى 10 كۇن ىشىندە بەلگىلى بولادى. كەيىن ءونىمدى وتكىزۋ جولدارى انىقتالادى.
رەسمي اڭشىلىق ماۋسىمى 3 شىلدەدە باستالىپ، 30 قاراشاعا دەيىن جالعاسادى. الايدا اتىلاتىن كيىكتىڭ جىنىسى مەن جاسىنا قاراي مەرزىمى وزگەشە: ەركەكتەرى — 1 شىلدەدەن 30 قاراشاعا دەيىن، انالىقتارى مەن بيىل تۋعان تولدەرى — 1 قىركۇيەكتەن 30 قاراشاعا دەيىن.
ەسكە سالايىق، بۇعان دەيىن قازاقستاندا 800 مىڭعا جۋىق اقبوكەن اۋلانۋى مۇمكىن ەكەنى حابارلانعان ەدى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ مالىمدەدى.
“عىلىمي نەگىزدەمەگە سايكەس، بۇگىنگى تاڭدا بۇكىل پوپۋلياسيانىڭ 20 پايىزىن تابيعي ورتادان الۋ ۇسىنىلىپ وتىر. كوكتەمگى ەسەپ قورىتىندىسى بويىنشا، قازاقستانداعى اقبوكەن سانى رەسمي تۇردە 3،9 ميلليونعا جەتتى. ونىڭ ىشىندە 2،3 ميلليونى – ورال پوپۋلياسياسىنا، 1،6 ميلليونى – بەتپاقدالا پوپۋلياسياسىنا، ال 78 مىڭى – ءۇستىرت پوپۋلياسياسىنا تيەسىلى. جالپى العاندا، ءبىز 4 ميلليونعا جۋىق، ناقتىراق ايتساق، 3 ملن 978 مىڭ دەپ ەسەپتەيمىز. وسىعان سايكەس 800 مىڭ اقبوكەندى اتۋ كوزدەلىپ وتىر”، — دەدى مينيستر.
ءمينيستردىڭ ايتۋىنشا، جانۋارلاردىڭ جىنىسى مەن جاسى دا ناقتى بەلگىلەنگەن.
“40% – اتالىقتار، 40% – انالىقتار، 20% – بيىل تۋعان ءتولى. ياعني، قازىرگى تاڭدا بىزدە بارلىق ەسەپ، پارامەترلەر ناقتىلانعان. وتكەن اپتادا عىلىمي نەگىزدەمەنى رەسمي تۇردە الدىق. بۇگىن ۇيىمداستىرۋشىلىق ماسەلەلەردى تالقىلادىق. بىر-ەكى كۇن ىشىندە شەشىمىمىزدى رەسمي تۇردە جاريالايمىز”، — دەدى ەرلان نىسانبايەۆ.
سونداي-اق مينيستر اقبوكەن ەتىن وڭدەۋگە ارنالعان جەكە ەت كومبيناتى سالىنۋى مۇمكىن ەكەنىن ايتتى.
“مۇنشاما كولەمدە جانۋار الىنسا، ەتىن وڭدەۋ ماسەلەسى وتە ماڭىزدى بولماق. سوندىقتان بۇگىنگى تاڭدا ءبىز جەرگىلىكتى قۇرىلىمدارمەن بىرلەسىپ، اقبوكەن ەتىن قايتا وڭدەيتىن ەت كومبيناتتارىن سالۋ بويىنشا ينۆەستيسيالىق جوبالاردى پىسىقتاپ جاتىرمىز. قازىرگى تاڭدا بۇل باستاماعا التىعا جۋىق كومپانيا قىزىعۋشىلىق ءبىلدىردى”، — دەدى ول.
