«Rýhanı jańǵyrý» baǵdarlamasy aıasyndaǵy mańyzdy jıyndy Túrkistan oblysynyń ákimdigi men Halyqaralyq Túrki Akademıasy ótkizdi.
Jıynǵa elimizden bólek Ázirbaıjan, Reseı, Túrkıa, Qyrǵyz Respýblıkasy, Ózbekstan, AQSH, Tájikstan, Úndistan memleketterinen týrkologtar men ǵalymdar jáne dıplomatıalyq ókildikterden de qonaqtar keldi. Konferensıany Halyqaralyq Túrki Akademıasynyń prezıdenti Darhan Qydyráli júrgizip otyrdy. Jıynda Túrkistan oblysynyń ákimi Janseıit Túımebaev Túrkistan qalasyn Túrki áleminiń rýhanı jáne mádenı ortalyǵyna aınalý baǵytynda jumystar bastalǵanyn málimdedi.
«Taıaý ýaqytta Túrkistanda Túrki áleminiń ortalyǵy boı kóteredi. Munda búkil Túrki dúnıesiniń oıshyldary men aǵartýshylarynyń, ǵalymdarynyń eńbekteri qoıylyp, ǵylymı jetistikteri kórsetiledi. Elbasy usynǵan «Túrki áleminiń 100 esimi» jobasyn Túrkistanda júzege asyrýǵa tolyq múmkindik bar. Oblysymyzdyń tarıhı oryndaryn «Túrki áleminiń kıeli jerleri» tizimine engizý jumystary júrgiziledi.
Sonymen birge, Túrkistanda Túrki keńesi jastarynyń quryltaıyn ótkizýge de daıynbyz.
Qazir jumyr jer betinde 200 mıllıonnan astam túrki tildes baýyrlarymyz bar. Eger saıası, ǵylymı jáne rýhanı birligimiz myǵym bolsa, bul úlken kúshke aınalady. Jahandaný zamanynda biz birge bolyp, qıyndyqtarǵa birge tótep berýimiz qajet. Búgingi týrkologtardyń basqosýy osy senim údesinen shyǵady degen oıdamyn. Túrki áleminiń ortalyǵy Túrkistanymyz osyndaı ıgi bastamalardy qoldaýǵa árqashan daıyn!», — dedi J.Túımebaev.
