Resei men Qazaqstannyń bilim jáne ǵylym salasyndaǵy yntymaqtastyǵy barǵan saiyn alańdaýshylyq týǵyzýda, - dep habarlaidy Dalanews.kz Fragment arnasyna siltep.
Ombyda ál-Farabi atyndaǵy QazUÝ-dyń filialynyń ashylǵany Fragment-tiń kóńilinde kúmán týǵyzǵan.
"Bul oqiǵa akademiialyq bailanystardyń keńeiýin ǵana emes, sonymen qatar Reseidiń Qazaqstandaǵy yqpalynyń artyp kele jatqanyn ańǵartady. QazUÝ Qazaqstandaǵy eń kóne ári abyroily oqý orny. Munda 25 myń stýdent bilim alady. Osyndai bedeldi ýniverdiń orys jerinde filial ashýy oń qadam siiaqty kórinýi múmkin. Alaida qazirgi geosaiasi jaǵdaidy eskere otyryp, bul oqiǵany múlde basqa qyrynan qarastyrý qajet. Kreml, postkeńestik keńistikte óz yqpalyn keńeitýge degen umtylysyn bir sátke de damyldatqan joq.
Bilim jáne ǵylym salasynda tájiribe almasý ánsheiin syltaý: Reseidiń Qazaqstandaǵy yqpalyn nyǵyzdai túsýdiń amaly. Muny Qazaqstandaǵy mańyzdy sferalardy "otarlaý" deitin aýqymdy strategiianyń bir bóligi retinde qarastyrý qajet", - dep jazdy arna.
Fragment-ke jetken málimet boiynsha "Pýtinniń Reseii" Orta Aziiadaǵy yqpalyn joǵaltpaý úshin soft power saiasatyn belsendi paidalana bastaǵan. Bilim men ǵylym salasy osy saiasattyń negizgi "rychagynyń" biri.
"Aldaǵy oqý jylynan bastap reseilik propaganda quraldary "eki el arasynadaǵy akamediialyq alys-beristen Qazaqstannyń utary kóp" degen agitatsiiany údete bastaidy.
Is júzinde bul Qazaqstannyń Reseidiń bilim jáne ǵylym baǵdarlamasyna birtindep táýeldi bolýyna alyp keledi", - dep paiymdaidy Fragment.
Qazaq ulttyq ýniversitetiniń reseilik seriktesi – Dostoevskii atyndaǵy Omby ýniversiteti de sózsiz bedeldi oqý orny.
"Alaida mundai yntymaqtastyqtyń qazirgi saiasi shyndyq kontekstinde neni bildiretini týraly oilaný kerek. Resei elimizdiń ekonomikadan bastap bilim berýge deiingi strategiialyq mańyzdy salalaryna dendep enip jatyr. Kreml bizdiń elmen bilim almasýǵa muqtaj emes, Máskeý qazaqstandyq óskeleń urpaqtyń júregi men sanasy úshin kúres júrgizýde. Qazaqstandyq ýniversitetter men ǵylymi institýttar geosaiasi quralǵa ainalmai, táýelsiz oi men innovatsiianyń tiregi bolyp qalýy kerek. Pýtinniń paranoiasy asqynǵan shaqta Qazaqstan barlyq salada óz táýelsizdigi men egemendigin qorǵaýǵa tiis. Reseidiń arbaýyna túspeýdiń jalǵyz joly osy", - dep jazdy arna.
