Opozısıalyq saıasatker, tirkelmegen "Alǵa" partıasynyń burynǵy jetekshisi Vladımır Kozlov merziminen buryn shartty túrde bosatylatyn boldy dep habarlady quqyq qorǵaýshy Evgenıı Jovtıs Facebook-te.
"Sot Kozlovty merziminen buryn shartty túrde bosatý týraly sheshim shyǵardy. Sot sheshimi 15 kúnnen soń kúshine enedi" dep jazdy Jovtıs.
Kozlov ózin merziminen buryn shartty túrde bosatý týraly ótinishti 16 maýsymda berip, ony Qapshaǵaı qalalyq soty qaraǵan.
Buǵan deıin advokat Aıman Omarova Kozlovtyń 2 tamyzda Almaty oblysy Zarechnyı kentindegi LA155/14 túzeý mekemesinde "túrme ishindegi túrme" - qatań jaǵdaıdaǵy abaqtydan jalpy rejımdegi abaqtyǵa aýystyrylǵanyn habarlaǵan.
Vladımır Kozlov qatań jaǵdaıdaǵy abaqtyda bir jyldan astam ýaqyt bolǵan. Ony 2015 jyldyń 27 shildesinde 10 kún túrme karserinde ustaǵannan keıin qatań jaǵdaıdaǵy abaqtyǵa japqan. Bıyl kóktemde túrme komısıasy Kozlovtyń tártibin "nóldik deńgeıde" (teris, ıa oń emes) dep baǵalaǵanymen, ony qatań tártiptegi abaqtyda qaldyrǵan.
Qazaqstanda sot sheshimimen qyzmetine tyıym salynǵan opozısıalyq "Alǵa" partıasynyń burynǵy basshysy Vladımır Kozlov Jańaózen oqıǵasyna qatysty "áleýmettik alaýyzdyqty órshitken" degen aıyppen 2012 jyly jeti jarym jylǵa sottalǵan. Vladımır Kozlov pen jaqtastary bılik taqqan aıyptardyń saıası astary bar dep biledi.
